Bo šasnaccać zvarotaŭ da Łukašenki skončylisia ni čym.
Bo šasnaccać zvarotaŭ da Łukašenki skončylisia ni čym.
11 červienia 2009 h. hrupa žančynaŭ — svajačak asudžanych, a taksama niazhodnych z rašeńniami sudoŭ, pryjšli na sustreču z hienprakuroram Ryhoram Vasilevičam. Jany źbiralisia pieradać jamu kalektyŭny zvarot z prośbaj razhledzieć pa sutnaści ich skarhi. Hienprakuror nie vyjšaŭ da žančynaŭ i jany źviarnulisia da presy. Pa słovach jurysta Tamary Siarhiej, niadaŭna žančyny pačali atrymlivać adkazy z Administracyi prezidenta, kudy jany źviartalisia z prośbaj paŭpłyvać na chadu ich spraŭ u sudach. «I voś ciapier my majem 77 kopij tych adkazaŭ, jakija adroźnivajucca tolki adrasami ludziej, jakim jany byli dasłanyja. Ludziam adkazali absalutna adnolkava, niezaležna ad taho, u kaho jakaja sprava była» —raspaviała T. Siarhiej. Miž inšym, u hrupie žančyn jość i tyja, što baroniać svaje pravy, jak naprykład, Halina Jubko ź Minsku, jakaja ad 2004 hodu šukaje praŭdy pra akaličnaści śmierci svajoj siastry, jak Viera Makarevič z Salihorsku, jakaja nie vieryć, što jaje syn nakłaŭ na siabie ruki.
Atrymaŭšy takija adkazy, žančyny vyrašyli źviarnucca da aŭtarytetnych mižnarodnych arhanizacyj. Jany padrychtavali zvarot da hienieralnaha sakratara AAN Pan Hi Muna, hiensakratara Rady Jeŭropy Tery Devisa, jeŭrakamisara pa źniešniaj palitycy Bienity Fierery-Valdnier i dyrektara Biuro pa demakratyčnych instytutach i pravach čałavieka ABSIE Janezu Lenarčyku. U zvarocie havorycca pra toje, što ŭsie sproby vyrašyć prablemy ŭdzielnikaŭ hrupy, u tym liku z dapamohaj zvarotaŭ da kiraŭnika dziaržavy (a ŭsiaho ich było 16), skončylisia ni čym. «Voś čamu my źviartajemsia da Vas z prośbaj davieści našy prablemy da biełaruskich uładaŭ i spadziajomsia, što ŭ Vas heta atrymajecca lepš, čym u nas. A my budziem adstojvać svaje pravy z nadziejaj na padtrymku mižnarodnaj supolnaści» — havorycca ŭ zvarocie. Jaho padpisali 170 čałaviek z usioj Biełarusi.
Kamientary