Zatrymany «sa zbrojaj» u Minsku — brat-bliźniuk asudžanaha i pakaranaha śmierciu Paŭła Sieluna
27 sakavika pres-słužba MUS paviedamiła, što ŭ Minsku kala stancyja mietro «Puškinskaja» milicyja zatrymała 30-hadovaha žychara Vilejskaha rajona, u jakoha pry sabie była zbroja. «U chodzie asabistaha dahladu znojdzienyja hazavy i sihnalny pistalety, patrony, łaziernaja ŭkazka i nož», — raskazali ŭ viedamstvie. Na «pakajalnym videa» mužčyna śćviardžaje, što hety nabor jamu dla taho, kab abaraniacca, i sam jon nikoli nie ŭdzielničaŭ u niesankcyjanavanych masavych mierapryjemstvach. Aktyvisty ź Vilejki paznali zatrymanaha i paviedamili pravaabaroncam, što heta Andrej Sialun — brat-bliźniuk asudžanaha da śmiarotnaha pakarańnia ŭ 2013 hodzie Paŭła Sieluna, piša spring96.org.
Taksama na «pakajalnym videa» demanstrujuć nibyta na telefonie zatrymanaha padpiski na «dekstruktyŭnyja telehram-kanały», try ź jakich — śviežyja. Padpiski na ich datavanyja adnym časam — u 12:41. Mužčyna śćviarždaje, što padpisany na telehram-kanały [nie ŭdakładniajecca na jakija] dla taho, «kab sačyć, jak skłalisia losy ludziej, jakich represavali».
«Raniej jon nieadnarazova pryciahvaŭsia da administracyjnaj adkaznaści. Pa dadzienym fakcie vyśviatlajucca ŭsie akaličnaści», — raskazali ŭ MUS.
12 červienia 2013 Hrodzienski abłasny sud pryznaŭ 23-hadovaha studenta histfaka BDU Paŭła Sieluna vinavatym pa čatyroch artykułach Kryminalnaha kodeksa: zabojstva dźviuch asob, učynienaje z asablivaj žorstkaściu; kradziež; ździek z trupaŭ; kradziež asabistych dakumientaŭ. Da hetaha małady čałaviek nie mieŭ sudzimaściaŭ. Svaje dziejańni jon patłumačyŭ reŭnaściu. Zabityja — jahonaja žonka i jaje kachanak, jakich jon zastaŭ u adnoj kvatery. Paŭła prysudzili da vyklučnaj miery pakarańnia — rasstrełu.
Kamientary