Čarhovaja apieracyja pa ratavańni ekanomiki? Raśpiačatvajuć niedatykalny bankaŭski rezierv na 2 miljardy rubloŭ
U Biełarusi isnuje Ahienctva pa harantavanym viartańni bankaŭskich depazitaŭ. Usie banki hadami pieraličvajuć tudy hrošy i farmirujuć niedatykalny rezierv, ź jakoha majuć adbycca vypłaty ŭkładčykam, kali niechta z bankaŭ raptam spynić dziejnaść i nie zmoža sam viarnuć depazity. Harantami zachavanaści srodkaŭ vystupajuć Nacbank i Ministerstva finansaŭ.
Ale niadaŭna ŭ hety śpis uniesieny jašče adzin harant — Bank raźvićcia — resursy jakoha časam vykarystoŭvajucca dla finansavańnia dziaržaŭnych prajektaŭ. Los harantavanych hrošaj pačaŭ vyhladać niepradkazalnym.
Navina ab uniasieńni źmien u zakon «Ab harantavanaj kampiensacyi bankaŭskich depazitaŭ» niezaŭvažna pramilhnuła na BiełTA 7 maja.
Deputat Vital Vasiukoŭ patłumačyŭ kaleham nieabchodnaść źmieny zakanadaŭstva kłopatam ab ludziach i pavyšeńniem efiektyŭnaści sistemy: viarnuć depazity zmohuć nie tolki fizasoby, ale i ipešniki, čas vypłaty depazitaŭ źmienšać, a akno dla spahnańnia — pavialičać; možna navat budzie vybrać — u hatoŭcy zabirać ci pieravodam na rachunak.
Ale samaje hałoŭnaje nie ŭ hetym.
«Zakonaprajektam praduhledžvajecca mahčymaść raźmiaščać časova svabodnyja hrašovyja srodki ahienctva ŭ ablihacyi Banka raźvićcia […] Bank raźvićcia pry hetym atrymaje dadatkovuju ŭstojlivuju krynicu finansavych resursaŭ […]», — havaryłasia na BiełTA.
Kali kazać prostymi słovami, realnyja hrošy Ahienctva pa harantavanym viartańni bankaŭskich depazitaŭ, jakija znachodziacca na rachunkach Nacbanka i Minfina, abmianiajuć na papiery Banka raźvićcia. I voś tut paŭstaje pytańnie: a kudy Bank ich patracić — moža być, kupić akcyi Koka-Koły i Tesły? Ci ŭsio ž puścić na padtrymku «kalektyŭnaha BMZ»?
U samim Banku raźvićcia «Našaj Nivie» z chodu nie dali adkazu, na što jany płanujuć tracić hetyja hrošy i jakaja častka z harantavanaha fondu pastupić na rachunki. My napisali im zapyt.
Pa najaŭnaj infarmacyi, ciapier suma bankaŭskaha reziervu blizkaja da 2 miljardaŭ biełaruskich rubloŭ — prynamsi hod tamu ŭ fondzie było kala 1,7 miljarda. Darečy, heta amal roŭna pamieru deficytu biudžetu za pieršy kvartał 2021-ha.
«Asabliva ŭsio heta vyklikaje niepakoj na fonie rytoryki pra novy inviestycyjny cykł i ŭzbujnieńnie ŭ jaho miežach roli Banka raźvićcia, — kamientuje situacyju ekanamist Dźmitryj Kruk. — Całkam dapuskaju, što ŭsia hetaja historyja ździajśniajecca dla taho, kab zabiaśpiečyć novaj porcyjaj hrošaj hety samy «inviestycyjny cykł».
Kali tak, u mianie jość vialikija sumnieńni, što hety inviestycyjny cykł akažacca bolš udałym za minułuju «madernizacyju» 2010-2014 hadoŭ. Pryčyn być upeŭnienym u pośpiechu ja nie baču. Kali «novy inviestycyjny cykł» akažacca nie stratnym, to nichto ničoha i nie zaŭvažyć, a voś kali nie, to heta moža pahoršyć mahčymaści Ahienctva vykonvać svaje abaviazacielstvy pa viartańni depazitaŭ».
Pa słovach Kruka, kali hlanuć na situacyju z pazicyi «jak jano pavinna być», to hrošy Ahienctva pavinny zachoŭvacca ŭ maksimalna likvidnych i nadziejnych instrumientach, kab układčyki byli ŭpeŭnieny, što ŭ vypadku niepłaciežazdolnaści niejkaha banka jany atrymajuć svaje hrošy nazad. I tamu zachavańnie hrošaj u Nacbanku vyhladaje najbolš nadziejnym u biełaruskich umovach.
«Pry farmalnaj acency ablihacyi Banka raźvićcia buduć kłasifikavacca jak pieršakłasny pa jakaści aktyŭ, ale nadziejnaść i likvidnaść de-jure i de-fakta mohuć istotna adroźnivacca, i nadziejnaść hetych instrumientaŭ budzie zaležać ad nadziejnaści i likvidnaści samoha Banka raźvićcia. I choć zaraz u dačynieńni da jaho, zdajecca, niama ab čym niepakoicca, harantavać, što takoje ž stanovišča nie źmienicca ŭ budučyni nichto nie moža. I navat kali pa hetych ablihacyjach, kali jany buduć u zamiežnaj valucie, budzie dadatkovaja adkaznaść Minfina, nichto nie moža dać 100% harantyj, što jany ich zmohuć vykanać u vyniku fors-mažoru», — ličyć Kruk.
Ale što ad hetaha prostamu čałavieku? Ci viernuć jamu depazit, kali jahony bank laśnie?
Jak ličać ekanamisty, pošukam «svabodnych» hrošaj unutry krainy ŭłady adterminoŭvajuć devalvacyju, zdolnuju zabić usie ekanamičnyja schiemy ŭ zakredytavanym dziaržaŭnym siektary. I kali hrošy treba budzie viartać, a ŭ Ahienctva ich nie budzie, to ŭłada nadrukuje hrošy — zrobić paźniej toje, čaho choča paźbiehnuć z dapamohaj finta z Bankam raźvićcia.
Niadaŭna ŭ biełaruskaj ekanomicy ŭžo pravodziłasia maštabnaja apieracyja pa vyratavańni BMZ, jaki staŭ faktyčna bankrutam i ciapier płacić zarobki z bankaŭskich kredytaŭ. U vyniku hihancki doŭh BMZ staŭ dziaržaŭnym.
Čytajcie: Minfin voźmie doŭh na siabie, banki štomiesiac buduć vydavać pa $6 miljonaŭ na zarobki: sakretny płan pa vyratavańni BMZ
Ciapier čytajuć
U Homieli zakryli zabiahałaŭku pradprymalnika-łukašysta i źniščyli jaho płakat sa Stalinym2
Kamientary