Dadaŭšy trochi ŭschodniaha kałarytu, pierarabiŭšy savieckich sałdataŭ na amierykanskich, a minčukoŭ — na bahdadcaŭ, damalavaŭšy na ruinach hrafici ź Miki Maŭsam, Sandaŭ Birk nazvaŭ svoj manumientalny tvor «Vyzvaleńnie Bahdada».
Birk viadomy jak postmadernist‑rymiejkier. Bolšaść jaho realistyčnych prac pryśviečanyja sučasnamu žyćciu: sacyjalnaja niespraviadlivaść, vuličny hvałt, turemnaje žyćcio. Ale natchnieńnie jon čerpaje z karcin minułych stahodździaŭ: batalnych scen i partretaŭ kłasičnych mastakoŭ. Naprykład, na stvareńnie sieryi prac pra sučasnyja vojny «Zahany vajny» jaho natchnili hraviury XVII stahodździa «Pakuty vajny», aŭtarstva Žaka Kało.
I voś jaho pravakacyjny pendzal dabraŭsia da biełaruskaj tematyki.
«Ja znajšoŭ pracu Vołkava ŭ knizie pra savieckaje realistyčnaje mastactva ŭ łos‑anželeskaj biblijatecy, — raspavioŭ Sandaŭ Birk karespandentu «NN». — Ja nie viedaŭ nazvy hetaj ka¬rciny ni pa‑rasiejsku, ni pa‑biełarusku, ale praca mnie vielmi spadabałasia. Jana zroblenaja ŭ vyraznym prapahandysckim styli, jana vieličnaja, napoŭnienaja ramantyčnymi vobrazami. Da taho ž, maje składanuju i vytančanuju kampazicyju: z uśmiešlivym sałdatam pasiaredzinie, jaki ŭźniaŭ vintoŭku. Heta kłasičnaja trochkutnaja kampazicyja».
Mastak kaža, što chacieŭ vykarystać prapahandyscki styl savieckaha žyvapisu, dzie ŭsie vyjaŭlenyja ludzi ščaśliva ŭśmichajucca, kab dać svaju satyryčnuju pierśpiektyvu na vajnu ŭ Iraku.
«Maja karcina — uvasableńnie taho, što abiacaŭ amierykanskamu narodu Džordž Buš, kali našaje vojska ŭvarviecca ŭ Irak. Kali ludzi na maich vystavach bačać «Vyzvaleńnie Bahdada», dyk śmiajucca, bo heta jaskrava satyryčny tvor».
Na pytańnie, ci byŭ Birk u Biełarusi, mastak adkazaŭ, što najblišejšy da nas punkt, dzie jamu daviałosia pabyvać, — heta Bierlin. «Ale ŭ svaich pracach ja časta vykarystoŭvaju napracoŭki savieckich mastakoŭ, — kaža Birk. — Mnie padabajecca, kali jość suviaź pamiž źmiestam staroj karciny i idejaj, jakuju ja žadaju pieradać u maim malunku».
Darečy, chadzili ŭpartyja čutki, što pieršaja viersija znakamitaj karciny Vołkava była namalavana ŭ 1942 hodzie na zamovu tahačasnaj administracyi i adlustroŭvała... prychod u horad niemcaŭ u 1941-m. Vołkaŭ, jak viadoma, pravioŭ akupacyju ŭ stalicy Biełarusi.
