Ludziam dajuć sutki i vialikija štrafy za ŭdzieł u łakalnym maršy u Sucharavie
U Sucharavie zatrymali ŭdzielnikaŭ dvarovaha maršu, ich aryštoŭvajuć na 10-15 sutak. Žančynu, jakaja zdymała šeście na videa z 12-ha paviercha, aštrafavali na 5800 rubloŭ, paviedamlajuć pravaabaroncy.
26 maja na vulicy Šaranhoviča, 59 prajšoŭ dvarovy marš, u jakim uziali ŭdzieł nie mienš za 30 čałaviek. Marš abyšoŭsia biez zatrymańniaŭ, ale pa ŭdzielnikaŭ pačali prychodzić dadomu ŭžo na nastupny dzień. U niekatorych ź ich doma praviali ahlady i kanfiskavali nacyjanalnuju simvoliku i techniku.
U Frunzienskim RUUSie na ŭdzielnikaŭ skłali pratakoły pa art. 24.23 KaAP za ŭdzieł u niesankcyjanavanym pikietavańni, a ich spravy 28 maja razhladzieli ŭ sudzie Frunzienskaha rajona.
Spravy 54-hadovaj Natalli Dyrykavaj i 41-hadovaj Śviatłany Ahanavaj nakiravali sudździu Andreju Mlečku. Vynik — 10 sutak kožnaj.
A voś 53-hadovaj Śviatłanie Hievaidzian-Rohavaj pašancavała mienš — jaje spravu razhladała sudździa Maryja Jarochina. Zatrymali Śviatłanu 27 maja ŭ jaje doma. Da jaje pryjšli supracoŭniki milicyi i ahledzieli kvateru. Pryčyn dla ahladu joj nie nazvali. Doma kanfiskavali ściahi, stužki, płanšet i telefony. Śviatłanu dastavili ŭ Frunzienski RUUS, dzie skłali pratakoł i pakinuli da suda. Sudździa Maryja Jarochina paličyła vinu žančyny dakazanaj i aryštavała Śviatłanu na 15 sutak.
47-hadovuju Irynu Malec taksama zatrymali doma 27 maja, vybiŭšy pry hetym dźviery. Siońnia jaje spravu razhledzieŭ sudździa Andrej Mlečka praz skajp. U Taćciany doma zastaŭsia 4-hadovy syn — heta značyć, što jaje pavinny byli vypuścić jašče ŭčora, nie paźniej za try hadziny paśla zatrymańnia. Ale nasupierak zakonu Irynu pakinuli ŭ RUUSie amal na sutki. Irynu zatrymali za toje, što jana zdymała šeście z 12 paviercha svajoj kvatery. Ale pa pratakole, Iryna nibyta ŭziała ŭdzieł u masavym mierapryjemstvie.
Sudździa Andrej Mlečka aštrafavaŭ Irynu na 5800 rubloŭ (200 bazavych) — heta maksimalnaje pakarańnie pa art. 24.23 KaAP dla matuli niepaŭnaletniaha dziciaci.
Ciapier čytajuć
«Na kancertach niama miesca radykalnamu nacyjanalizmu, ahresii i hvałtu». Maks Korž vykazaŭsia nakont skandału, jaki razhareŭsia paśla jaho vystupu ŭ Varšavie3737
Kamientary