Hałoŭčanka raskryŭ płan na vypadak pašyreńnia jeŭrapiejskich sankcyj
Pra heta zajaviŭ premjer-ministr Biełarusi Raman Hałoŭčanka, piša BiełTA.
«Avijacyjnyja ŭłady Biełarusi z samaha pačatku źviarnulisia da ŭsich datyčnych bakoŭ z prośbaj dać źviestki abjektyŭnaha kantrolu. Dahetul nivodnaha takoha dakumienta na naš adras nie pastupiła. Pry hetym usie źviestki abjektyŭnaha kantrolu ź biełaruskaha boku byli nieadkładna nakiravanyja ŭ Mižnarodnuju arhanizacyju hramadzianskaj avijacyi (ICAO) i šerah inšych jeŭrapiejskich struktur, jakija zajmajucca avijacyjnaj biaśpiekaj», — skazaŭ Hałoŭčanka.
Jon adznačyŭ, što zachodnija palityki patrabujuć nieadkładnaha rasśledavańnia situacyi z rejsam Ryanair. «My taksama hetaha chočam, ale heta pytańnie nie da nas. My vystupili na pasiadžeńni Savieta ICAO, vykazali svaju pazicyju, ale ICAO da hetaha času nie prystupiŭ da rasśledavańnia. Mianie infarmavali, što kamisiju pakul nie sfarmiravali», — zajaviŭ premjer-ministr.
«My ŭpeŭnienyja ŭ svajoj pravacie i hatovyja adstojvać svaje intaresy ŭ sudovym paradku. Miarkuju, my zmožam damahčysia kampiensacyi ŭsioj naniesienaj nam škody», — pierakanany Raman Hałoŭčanka.
Taksama Hałoŭčanka zajaviŭ, što abjom škody, naniesienaj sankcyjami biełaruskaj ekanomicy, u teoryi składzie 2,9% VUP.
«U Biełarusi pracuje vialikaja kolkaść zamiežnych kampanij. Ja b chacieŭ, kab palityki padumali pra losy svaich biznesaŭ. My viedajem, čym zamianić, my viedajem pastaŭščykoŭ, my viedajem, jak pieraaryjentavacca. My hatovyja pieraklučycca na azijackija technałohii. Adzin Kitaj moža zamianić 90% usich jeŭrapiejskich i amierykanskich technałohij. Plus da hetaha rasijskija technałohii», — miarkuje premjer-ministr.
Z suboty 5 červienia Jeŭrasajuz aficyjna zakryŭ dla ŭsich biełaruskich samalotaŭ pavietranuju prastoru i aeraporty ES. Padstavaj dla ŭviadzieńnia žorstkich abmiežavalnych mier stała prymusovaja pasadka ŭ Minsku samalota Ryanair, jaki lacieŭ z Afin u Vilniu, i zatrymańnie Ramana Pratasieviča i Safii Sapiehi.
Kamientary