I paabiacaŭ, što spravy prasicielek i ich blizkich buduć pierahledžany.
Na sustrečy z pradstaŭnikami hrupy žančyn 9 lipienia ŭ Minsku hienieralny prakuror Ryhor Vasilevič zajaviŭ, što spravy prasicielek i ich blizkich buduć pierahledžany. Ab hetym paviedamiła BiełaPAN pravaabaronca Halina Jubko.
Pavodle jaje słoŭ, da hienprakurora na asabisty pryjom, jaki pravodzicca raz u miesiac, źjavilisia 22 pradstaŭniki hrupy žančyn, paciarpiełych ad asabliva ciažkich złačynstvaŭ, nie zhodnych z rašeńniami sudoŭ pa svaich hramadzianskich spravach i kryminalnych spravach svaich blizkich. Pravaabaronca pieradała Vasileviču kalektyŭny zvarot z prośbaj ab sustrečy ad usich 22 prasicielek, jakija prybyli ŭ stalicu z roznych rehijonaŭ krainy.
Hienieralny prakuror vyjšaŭ da žančyn, dobrazyčliva ich vysłuchaŭ i zajaviŭ, što spravy, pa jakich jany chadajničajuć, buduć pierahledžany, skazała Jubko. Pavodle jaje słoŭ, za čatyry hady chadžeńnia ŭ Hienprakuraturu jana ŭpieršyniu sustreła razumieńnie z boku kiraŭnictva hałoŭnaha nahladnaha orhana krainy.
Razam z tym, jak adznačyła pravaabaronca, 7 lipienia padčas asabistaha pryjomu hramadzian staršynia Viarchoŭnaha suda Valancin Sukała admoviŭsia abmiarkoŭvać z pradstaŭnikami hrupy žančyn ich prablemy. Pavodle słoŭ Jubko, nieabchodnaść sustrečy była abumoŭlenaja tym, što na svaje indyvidualnyja skarhi ŭ paradku nahladu žančyny hadami atrymlivajuć ź Viarchoŭnaha suda ničoha nie značnyja adpiski. «Takija adkazy parušajuć našy pravy, pradastaŭlenyja artykułam 40 Kanstytucyi Respubliki Biełaruś i artykułam 14 Mižnarodnaha pakta ab hramadzianskich i palityčnych pravach», — skazała pravaabaronca.
U hetaj situacyi, pavodle jaje słoŭ, žančyny vyrašyli 10 lipienia nakiravać kalektyŭny zvarot prezidentu krainy Alaksandru Łukašenku i dziaržsakrataru Savieta biaśpieki Juryju Žadobinu. U zvarocie vykazvajecca nadzieja na adnaŭleńnie parušanych pravoŭ hramadzian, pradastaŭlenych Kanstytucyjaj Respubliki Biełaruś.
