Zianon Paźniak ličyć, što na vybarach 1994 hodu pieramožcam pavinien byŭ stać Biełaruski narodny front. Jon ličyć, što dla hetaha była stvoranaja palityčnaja baza. «U kancy 1992 hodu, paśla niezakonnaj admieny refierendumu ab novych palityčnych vybarach, apazicyja BNF u Viarchoŭnym saviecie pastaviła zadaču dabicca adstaŭki Kiebiča», — tłumačyć palityk.
Pa jaho słovach, była praviedzienaja dosyć udałaja praca, nakiravanaja suprać Viačasłava Kiebiča. «Adnak hetaja praca była ŭmieła skarystanaja KDB i Maskvoj, jakija vystavili svajho kandydata‑terminatara Łukašenku, a paśla z dapamohaj vialikich finansavych, ahienturnych i prapahandysckich resursaŭ pryviali jaho da ŭłady», — dadaje Zianon Paźniak.
Jon ličyć, što hramadstva lohka paddavałasia na papulisckija łozunhi, bo zastavałasia savieckim va ŭmovach kryzisu. «Samaje važnaje, što ŭ toj čas hramadstva nie mieła pryvatnaj ułasnaści, a heta značyć, što jano nie mieła žyćciova nieabchodnaj svabody i nieabchodnaści jaje abaraniać», — upeŭnieny apazicyjanier.
Palityčny emihrant ličyć, što na toj momant u Alaksandra Łukašenki nie było navat vyznačanaj prahramy, aproč papulisckaj krytyki.
«U druhi kruh hałasavańnia realna vyjšli Paźniak i Łukašenka, adnak z boku ŭładaŭ byŭ prymienieny administracyjny resurs, u vyniku jakoha u druhi tur vyjšli Kiebič i Łukašenka».
Pa słovach Zianona Paźniaka, apošniaja mahčymaść vypravić stanovišča i nie dapuścić «antybiełaruskija» siły da ŭłady była paśla pieršaha kruhu, kali Viačasłavu Kiebiču było prapanavana źniać svaju kandydaturu. «Pa zakonu paśla hetaha pavinny byli prajści vybary z novymi kandydatami, ale Kiebič nie rašyŭsia pajści na taki krok», — kanstatavaŭ palityk.
