Niekatoryja VNU vyznačylisia z apłataj navučańnia ŭ novym 2009/2010 navučalnym hodzie.
U mai na adnoj z pres‑kanfierencyj pieršy namieśnik ministra adukacyi Alaksandr Žuk supakojvaŭ: «Košt navučańnia ŭzhodnieny nie tolki z zacikaŭlenymi viedamstvami, ale i z pradstaŭnikami VNU», ministerstva «śpiecyjalna raspracavali dakumient, zhodna ź jakim prapanavali nie pavyšać taryfy na navučańnie».
Adnak niekatoryja VNU, naprykład, Biełaruski dziaržaŭny miedycynski univiersitet albo Biełaruski dziaržaŭny ekanamičny univiersitet, da prapanovy Minadukacyi nie asabliva prysłuchalisia i pavialičyli košty na adukacyju z novaha navučalnaha hoda.
Pieršakurśnikam stamatałahičnaha fakulteta BDMU zaraz pryjdziecca płacić za vučobu 6 miljonaŭ rubloŭ.
Niešta padkazvaje, što i astatnija univiersitety naŭrad ci zamaroziać košty, tym bolš što prykład užo jość.
My vyrašyli skłaści tablicu koštaŭ navučańnia ŭ šaści samych zapatrabavanych univiersitetach Biełarusi z punktu hledžańnia ŭstupnaha konkursu ŭ minułym hodzie. U niejkim sensie heta dapamoža abituryjentam, jakim nie paščaścić stać studentami biudžetnych adździaleńniaŭ, zaryjentavacca z canoj na adukacyju.
***
Košty navučańnia ŭ niekatorych VNU
Košt navučańnia ŭ 2008/2009 hh.
Biełaruski dziaržaŭny univiersitet: 2.467.700 — 4.572.000
Biełaruski dziaržaŭny miedycynski univiersitet: 4.740.000 — 5.700.000
Biełaruski nacyjanalny techničny univiersitet: 2.850.000 — 3.200.000
Biełaruski dziaržaŭny ekanamičny univiersitet: 2.965.000 — 3.095.000
Minski dziaržaŭny linhvistyčny univiersitet: 1.764.000 (za II siemiestr)
Biełaruski dziaržaŭny univiersitet infarmatyki i radyjoelektroniki: 2.950.000
Akademija kiravańnia pry prezidencie RB: 3.408.000
Košt navučańnia ŭ 2009—2010 hh.
Biełaruski dziaržaŭny univiersitet: nie vyznačany
Biełaruski dziaržaŭny miedycynski univiersitet: 4.980.000 — 6.000.000
Biełaruski nacyjanalny techničny univiersitet: nie vyznačany
Biełaruski dziaržaŭny ekanamičny univiersitet: 3.276.890 — 3.379.380
Minski dziaržaŭny linhvistyčny univiersitet: 1.764.000 (za I siemiestr)
Biełaruski dziaržaŭny univiersitet infarmatyki i radyjoelektroniki: nie vyznačany
Akademija kiravańnia pry prezidencie RB: nie vyznačany
***
Prachadnyja bały buduć pryblizna takija, jak u minułym hodzie
Pačaŭsia pryjom dakumientaŭ u VNU tak zvanaj pieršaj chvali— Vajennuju akademiju i Akademiju MUS, Homielski inžynierny i Kamandna‑inžynierny instytut MNS, a taksama ŭ Akademiju muzyki, Univiersitet kultury i mastactva.
U astatnija VNU abituryjenty buduć sprabavać pastupić z 26 pa 30 lipienia. Jak paviedamiŭ telekanał STB, padčas «pramoj linii» ŭ redakcyi haziety «Sovietskoj Biełoruśsii», jakaja prajšła 14 lipienia, ministr adukacyi Alaksandr Radźkoŭ skazaŭ, što ŭ hetym hodzie prachadnyja bały ŭ VNU krainy buduć pryblizna takija, jak i ŭ minułym.
Kali tak, to abituryjenty ŭžo siońnia mohuć acanić svaje šancy stać studentami. Niekatoryja VNU na svaich sajtach utrymlivajuć infarmacyju nakont prachadnych bałaŭ u 2008 hodzie.
My možam nahadać, što składaniej za ŭsio ŭ 2008 hodzie było pastupić na niekatoryja śpiecyjalnaści Biełaruskaha dziaržaŭnaha ekanamičnaha univiersiteta.
U liderach, jak zaŭsiody, byŭ fakultet finansaŭ i bankaŭskaj spravy. Konkurs na śpiecyjalnaść «Bankaŭskaja sprava», naprykład, skłaŭ 4,3 čałavieka na miesca pry prachadnym bale 367 (!).
Maryć pra studencki bilet BDU mahli abituryjenty, jakija nabrali bolš za 300 bałaŭ. Naprykład, prachadny bał na «Mižnarodnaje prava» i «Mižnarodnyja adnosiny» byŭ 338, «Mieniedžmient» — 337, na «Biźnies‑administryravańnie» — 331, «Sučasnyja zamiežnyja movy» — 326, «Mytnaja sprava» — 317, na ŭsie śpiecyjalnaści ekanamičnaha fakulteta 315. A voś, kab pastupić na jurydyčny fakultet, dastatkova było nabrać 276 bałaŭ.
Letaś upieršyniu za apošnija hady adznačaŭsia nie asabliva vysoki konkurs u Dziaržaŭny miedycynski univiersitet — 290 bałaŭ na lačebny fakultet. A voś litaralna na ŭsie fakultety Biełaruskaha dziaržaŭnaha univiersiteta infarmatyki i radyjoelektroniki nielha było pastupić, nie nabraŭšy 304 bały. A na fakultet kampjuternych sistem i sietak zaličvali ščaśliŭčykaŭ, vynik zdačy testaŭ jakich razam z bałam atestata dasiahaŭ 340 bałaŭ.
Darečy, u hetym hodzie ŭsie čakali vialikaj kolkaści pastupajučych z‑za padvojenych vypusknych kłasaŭ. Adnak u 2008 hodzie było napisana 457 tysiač 221 test, u hetym — 465.371. Tolki pałova abituryjentaŭ — sioletnija vypuskniki škoł. Astatnija — tyja, chto skončyŭ škołu ŭ minułyja hady, a taksama vypuskniki PTV, siarednie‑śpiecyjalnych vučyliščaŭ. I ich vyniki CT značna nižejšyja, čym u vypusknikoŭ škoł-2009.
