Siamiejnuju paru asudzili 6 raz za «ekstremizm» u pryvatnaj pierapiscy — za kratami jany praviaduć užo 84 dni kožny
Siońnia ŭ šosty raz asudzili 26-hadovuju Anastasiju Krupienič-Kandraćjevu i 26-hadovaha Siarhieja Krupieniča pa č. 2 art. 19.11 (raspaŭsiudžvańnie infarmacyjnaj pradukcyi, jakaja źmiaščaje zakliki da ekstremisckaj dziejnaści abo prapahanduje takuju dziejnaść). Papiaredni prysud u ich zakančvajecca tolki ŭ subotu, 25 vieraśnia. Ale na Anastasiju i Siarhieja ŭ Leninskim RUUSie ŭ čarhovy raz skłali novyja pratakoły pa art. 19.11 KaAP.
Ich spravy 23 vieraśnia razhladała sudździa Leninskaha rajona Taćciana Šocik. U hety raz pratakoły na muža i žonku skłali za pierasyłku paviedamleńniaŭ 18 červienia adno adnamu, ale z roznych «ekstremisckich» kanałaŭ. Na sudzie Anastasija skazała, što naohuł nie viedała ab tym, što hety kanał pryznany «ekstremisckim» i što nielha takoje dasyłać u pryvatnych paviedamleńniach mužu. Vynik — 13 sutak aryštu.
Siarhiej paabiacaŭ sudździ nikoli bolš nie čytać telehram-kanały, ale sudździa Šocik taksama pakarała mužčynu 13-sutačnym aryštam.
Anastasija Krupienič-Kandraćjeva — nastaŭnica ŭ minskaj himnazii, u žniŭni ŭ jaje zakančvaŭsia kantrakt. Anastasiju i Siarhieja pieršy raz zatrymali ŭ siaredzinie lipienia. Z taho času ich asudzili ahułam na 84 sutki kožnaha za toje, što jany pierasyłali ŭ pryvatnych paviedamleńniach adno adnamu infarmacyju z «ekstremisckich kanałaŭ». Viadoma, što paśla zatrymańnia siamji na adnym z praŭładnych th-kanałaŭ źjaviłasia pakajalnaje videa z Anastasijaj. Prapahandyst Azaronak śćviardžaŭ, što jana dasłała ŭ ekstremiscki kanał asabistyja dadzienyja dziaciej supracoŭnikaŭ milicyi.
Čytajcie taksama: U Rasii aktrysu, jakaja źniałasia ŭ paradyjnym roliku ŭ palicejskaj formie, aryštavali na 10 sutak
Kamientary