17 lipienia na sajcie MUS źjaviłasia aficyjnaja zajava MUS pa spravie Mikałaja Aŭtuchoviča. Jak i prahnazavałasia, ciapier pradprymalnika abvinavačvajuć i ŭ teraryźmie. Pryvodzim źmiest zajavy:
«U ŚMI apošnim časam aktyŭna aśviatlajecca tema, źviazanaja z zatrymańniem i pryciahnieńniem da kryminalnaj adkaznaści pradprymalnika Aŭtuchoviča i šerahu inšych asobaŭ u suviazi ź ich nibyta aktyŭnaj palityčnaj dziejnaściu. U suviazi z hetym Ministerstva ŭnutranych spravaŭ ličyć mahčymym paviedamić nastupnaje.
U studzieni 2009 hodu ŭ chodzie apieratyŭna‑vyšukovych mierapryjemstvaŭ Hałoŭnym upraŭleńniem pa baraćbie z arhanizavanaj złačynnaściu MUS (HUBOP) była atrymanaja infarmacyja ab datyčnaści vaŭkavyskaha pradprymalnika Aŭtuchoviča da padpałaŭ, što byli letam i vosieńniu 2005 hodu, majomaści byłoha načalnika Vaŭkavyskaha RUUS Kacuby i rabotnika inśpiekcyi Ministerstva pa padatkach i zborach Mandziku.
Dadzienyja fakty znajšli paćviardžeńnie ŭ vyniku pravierki atrymanaj infarmacyi.
8 lutaha 2009 hodu ŭ chodzie praviadzieńnia śledčych dziejańniaŭ pa kryminalnaj spravie pa faktach źniščeńnia majomaści byli zatrymanyja Aŭtuchovič, Asipienka i Lavonaŭ, i źmieščanyja ŭ śledčy izalatar. U vyniku hetym asobam byli pradjaŭlenyja abvinavačvańni pa artykule 218 KK.
Adnačasova ŭ pole zroku HUBOP trapiŭ hramadianin Ł. (Łaryn — «NN»), jak asoba, jakaja maje padrychtoŭku pa abychodžańni sa zbrojaj i vybuchovymi rečyvami. U vyniku praviedzienych śledčych dziejańniaŭ byli atrymanyja dokazy datyčnaści Ł. Da ździajśnieńnia ciažkich złačynstvaŭ u Hrodzienskim rehijonie z vykarystańniem zbroi i vybuchovych pryład.
U pracesie dalejšaj śledčaj pracy dadzienyja złačynstvy byli daśledavanyja razam. U vyniku čaho ŭstanoŭlenyja fakty arhanizacyi Aŭtuchovičam padrychtoŭki da fizičnaj likvidacyi staršyni Hrodzienskaha abłvykankamu Saŭčanki z metaj akazańnia ŭździejańnia na rašeńni, jaki prymajucca dziaržaŭnymi orhanami, a taksama praz pomstu. Aproč taho, było ŭstanoŭlena, što letam i vosieńniu 2005 hodu Aŭtuchovič ź inšymi asobami rychtavali zamach na namieśnika ministra pa padatkach i zborach Kamianko.
23 červienia 2009 hodu hałoŭnym śledčym upraŭleńniem papiaredniaha rasśledavańnia MUS u dačynieńni Aŭtuchoviča i inšych asob zaviedzienaja kryminalnaja sprava pa artykule 359 (terarystyčny akt)».
