Inžyniera z «Naftana» aryštavali na 15 sutak za fota z płakatam u padtrymku «Tutbaja» ŭ instahramie
41-hadovy inžynier-kanstruktar Alaksandr Bałonkin pracuje na «Naftanie», źjaŭlajecca namieśnikam kiraŭnika niezaležnaha prafsajuza rabotnikaŭ «Naftana». Jaho zatrymali jašče 27 vieraśnia na pracoŭnym miescy, pieradajuć pravaabaroncy.
U navapołackim HAUSie na mužčynu skłali pratakoł pa art. 19.11 KaAP (Raspaŭsiudžvańnie infarmacyjnaj pradukcyi, jakaja źmiaščaje zakliki da ekstremisckaj dziejnaści abo prapahanduje takuju dziejnaść). Pravaparušeńnie, na dumku milicyjantaŭ, u tym, što na svajoj staroncy ŭ Instagram «Alaksandr raspaŭsiudziŭ infarmacyjny pradukt, uklučany ŭ respublikanski śpis ekstremisckich materyjałaŭ». Da piśmovych materyjałaŭ spravy byŭ dałučany skrynšot publikacyi, na jakim mužčyna staić z płakatam «Ja/MY TUT.baj».
Spravu Alaksandra 1 kastryčnika razhladzieła sudździa Navapołackaha rajona Zinaida Bałabołava. Bałonkin na sudzie svaju vinu nie pryznaŭ i sprabavaŭ daviedacca, jak milicyjanty vyjavili, što heta staronka ŭ Instagram mienavita jaho. Pa słovach Alaksandra, u jaho niama asabistaj staronki, tamu jon nie viedaje, kamu naležyć publikacyja. Niahledziačy na heta, sudździa Bałabołava aryštavała mužčynu na 15 sutak mienavita za «ekstremiscki» łahatyp na fota ŭ Instagram.
Kamientary