Leanid Sudalenka: Pryjemna čuć, jak śviedki na sudzie kažuć «dziakuj», źviartajučysia ŭ kletku
Pravaabaronca «Viasny» Leanid Sudalenka i vałanciorka Taćciana Łasica ŭtrymlivajucca za kratami ŭ homielskim SIZA-3 amal užo dzieviać miesiacaŭ. Z treciaha vieraśnia ŭ sudzie Centralnaha rajona Homiela ŭ zakrytym režymie adbyvajecca sud nad imi i jašče adnoj vałanciorkaj Maryjaj Tarasienka. Usich ich vinavaciać u arhanizacyi i padrychtoŭcy dziejańniaŭ, što hruba parušajuć hramadski paradak (č. 1 art. 342 KK), i navučańni i padrychtoŭcy asobaŭ dla ŭdziełu ŭ takich dziejańniach, a taksama ich finansavańni abo inšym materyjalnym zabieśpiačeńni (č. 2 art. 342 KK).
Leanid Sudalenka z-za krataŭ raspavioŭ, što adbyvajecca na zakrytym sudzie, jak jon pravioŭ svoj dzień narodzinaŭ, kali budzie vyniesieny prysud i čamu jany z Taćcianaj nie stali pisać prašeńnie ab pamiłavańni.
Leanid napisaŭ list na svoj Dzień narodzinaŭ — 23 vieraśnia. Jon raspavioŭ, jak prajšoŭ jaho dzień, kali jamu spoŭniłasia 55 hadoŭ:
«Siońnia [23 vieraśnia] mianie vazili znoŭ u sud, užo ŭ 15-y raz. Ja prasiŭ u hety dzień pierapynak — admova. Pastavili z ranku i da viečara pierad Fiemidaj. Apytańnie śviedak, jakija źviartalisia ŭ ofis pa dapamohu, začytvańnie materyjałaŭ spravy. Žonka ź dziećmi taksama prasili ŭ hety dzień spatkańnie. «Niama pravavych padstaŭ», — skazaŭ sud».
Ciapier Sudalenka napisaŭ u liście, što ŭ materyjałach užo 80 tamoŭ. Adna z pryčyn, pa jakoj sud zrabili zakrytym, — «biaśpieka śviedak». Ale, jak adznačaje viasnoviec, «sami śviedki ni snom, ni ducham».
Usiaho pa kryminalnaj spravie dapytali kala 200 čałaviek. Pa infarmacyi Leanida, na sudzie byŭ dapytany 61 čałaviek — u asnoŭnym, heta klijenty, jakija źviartalisia da pravaabaroncy pa pravavuju dapamohu:
«Usie śviedki ŭ sudzie skazali praŭdu, i heta hałoŭnaje. Pryjemna čuć, jak ludzi, jakija prychodziać u sud pa pozvach, kažuć «dziakuj», źviartajučysia da mianie ŭ kletku. I heta niahledziačy na zaŭvahi suda».
Pravaabaronca miarkuje, što prysud budzie vyniesieny ŭ siaredzinie kastryčnika.
Kamientary