Piaty pakiet sankcyj JeC suprać Łukašenki zasiarodzicca na tych, chto arhanizoŭvaje mihracyju ŭ JeC, raspavioŭ ambasadar u Biełarusi Dyrk Šubiel. Tym nie mienš hałoŭnaja dla Brusiela tema — pravy čałavieka ŭ Biełarusi, piša DW.
Piaty pakiet sankcyj suprać režymu Alaksandra Łukašenki budzie nakiravany pierš za ŭsio suprać asob i kampanij, adkaznych za pierapraŭku mihrantaŭ z krain Blizkaha Uschodu i Afryki ŭ ES praz terytoryju Biełarusi. Ambasadar ES u Biełarusi Dyrk Šubiel zajaviŭ pra heta ŭ aŭtorak, 26 kastryčnika, vystupajučy ŭ Brusieli na słuchańniach u kamitecie Jeŭraparłamienta pa zamiežnych spravach,.
Dypłamat padkreśliŭ, što zakliki ES da ŭładaŭ Biełarusi zastajucca niaźmiennymi: vyzvaleńnie palitviaźniaŭ, spynieńnie represij i novyja vybary. «Na žal, usie našy zakliki zastalisia niepačutymi. Tamu my ciapier rychtujem piaty pakiet sankcyj, jaki, chutčej za ŭsio, zasiarodzicca ŭ pieršuju čarhu na pytańni mihracyi, ale nie tolki», — adznačyŭ Šubiel. Hłybiej u detali jon nie ŭdavaŭsia, bo ŭ ES zaŭsiody trymajuć u sakrecie sankcyi da ich aficyjnaha ŭviadzieńnia. Pryniaćcie piataha pakieta čakajecca ŭ listapadzie.
Šubiela spytali i pra toje, ci pašyryć ES sankcyi na ŭvieś impart kalijnych uhnajeńniaŭ ź Biełarusi. «Čas pakaža. Heta budzie zaležać i ad dziejańniaŭ biełaruskich uładaŭ… Kali nie buduć vyzvalenyja palitviaźni, kali hvałt suprać mirnych ludziej praciahniecca, to mahčymyja ŭsie varyjanty, uklučajučy śfiery, jakija źjaŭlajucca bolš adčuvalnymi dla ES», — adkazaŭ jon.
Ambasadar paćvierdziŭ, što ŭ Brusieli praciahvajucca dyskusii ab mahčymych sankcyjach u dačynieńni da kampanii «Biełavija». Pytańnie samalotaŭ, pradstaŭlenych u lizinh biełaruskamu dziaržaŭnamu avijapieravozčyku kampanijami ź Jeŭrasajuza, taksama abmiarkoŭvajecca, dadaŭ dypłamat.
Šubiel nahadaŭ, što ES udałosia ŭhavaryć ułady Iraka spynić paloty ŭ Biełaruś jak minimum da kanca hoda. Pavodle jaho słoŭ, Brusiel havoryć i ź inšymi krainami — na Blizkim Uschodzie, u Azii i Afrycy. Kankretna jon nazvaŭ tolki dźvie krainy: Pakistan i Turcyju. Adzin ź jeŭradeputataŭ źviarnuŭ uvahu na toje, što sa Stambuła ŭ Minsk tolki napiaredadni, 25 kastryčnika, było čatyry avijarejsy. Šubiel adkazaŭ, što choć hetymi samalotami mahli skarystacca i mihranty, ale jość i vialiki popyt na paloty ŭ Stambuł, bo heta praktyčna adzin z dvuch varyjantaŭ dabracca ź Biełarusi ŭ ES: albo na mašynie, aŭtobusie ci ciahniku da Vilni, a adtul na samalocie; albo pa pavietry ź pierasadkaj u Stambule.
«Samaja važnaja tema — heta situacyja z pravami čałavieka. Mnohija z nas siońnia kažuć ab mihracyi, sapraŭdy źjaŭlajecca vialikaj prablemaj, u asablivaści dla troch krain ES, jakija susiedničajuć ź Biełaruśsiu. Ale my nie pavinny zabyvać, što najbolšaja naša prablema — situacyja z pravami čałavieka ŭ samoj Biełarusi, tamu što ad jaje pakutujuć ludzi», — zajaviŭ Šubiel.
Pavodle słoŭ pasła, zachodnim dypłamatam u Biełarusi bolš nie dazvalajuć prysutničać na sudovych pasiadžeńniach. Jon nahadaŭ, što ŭ najbližejšy čas čakajucca sudovyja rašeńni ŭ dačynieńni da Siarhieja Cichanoŭskaha i Mikałaja Statkieviča i paabiacaŭ, što dypłamaty buduć prysutničać pierad sudom u Homieli.
Ciapier čytajuć
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier
«Kali ciapier chierova, značyć, heta jašče nie kaniec». Pahutaryli z epatažnym «śviatarom XXI stahodździa», pra jakoha nie było čuvać piać hadoŭ paśla aryštu44
Kamientary