«Navat padnačalenyja Čamadanavaj admovilisia». Što viadoma pra Natallu Sacharčuk, jakaja stała pres-sakratarkaj MUS
Na miesca zvolnienaj Volhi Čamadanavaj u pres-słužbu MUS pryjšła małaviadomaja Natalla Sacharčuk. U žurnalistaŭ jana asacyjujecca z adździełam ahitacyi i prapahandy Bresckaha DAI. Jana tam doŭha pracavała, pierad tym jak stała aficyjnym pradstaŭnikom UUS Bresckaha abłvykankama.
Natalla Sacharčuk rodam ź milicejskaj dynastyi. Jaje dzied byŭ načalnikam Karmianskaha RUUS jašče ŭ savieckija časy. Baćka — pałkoŭnik u adstaŭcy Michaił Zialony — kaliści ŭznačalvaŭ bresckuju milicyju. Muž Sacharčuk taksama milicyjanier: słužyć u abłasnoj DAI.
Sama Natalla vučyłasia i rasła ŭ Breście, a paśla taksama pajšła pracavać u milicyju. Spačatku śledčaj, a zatym pierajšła ŭ abłasnuju DAI. Bolš za 10 hadoŭ jana ŭznačalvała adździaleńnie ahitacyi i prapahandy Bresckaj abłasnoj DAI.
Potym bolš za dva hady kiravała pres-słužbaj UUS Bresckaha abłvykankama. Abłasnym pres-sakratarom stała paśla taho, jak z pasady źniali Siarhieja Dučenku.
«Pazicyja pres-sakratara ŭ sistemie MUS zaŭsiody była ryzykoŭnaj, bo možna było vylecieć tolki paśla «niapravilnaha», na dumku načalstva, kamientara žurnalistam. Tak adbyłosia i z Dučenkam — jaho mocna panizili, a na jaho pasadu ŭziali Sacharčuk, — raskazała «Našaj Nivie» abaznanaja krynica ź sistemy MUS. — Na pasadu pres-sakratara MUS jana prychodzić hetak ža vypadkova, jak niekali prychodziła Čamadanava.
Karjernaja situacyja ŭ Breście Sacharčuk ničoha ŭžo nie abiacaje — vyšej nie skočyć. A pry pieravodzie ŭ Minsk vymaloŭvajecca pierśpiektyva atrymać pahony pałkoŭnika (ciapier jana padpałkoŭnik — zaŭv. «NN») i słužbovuju kvateru: raniej u Minsk nie vielmi chacieli jechać — supracoŭnikam pres-słužby nie davali žylla».
Taksama ŭ hetaj historyi jość peŭnaja admietnaść: nichto, aproč Sacharčuk, nie pahadziŭsia być pres-sakratarom MUS.
«Rabotniki razumiejuć, historyja, pačataja ŭ 2020-m, jašče nie skončana, — kaža naša krynica. — Iści na pasadu pres-sakratara aznačaje paŭtaryć los Čamadanavaj — atrymlivać na svoj adras praklony, biez mahčymaści admycca, skazaŭšy, što tolki vykonvaŭ zahady.
Tamu nivodny z padnačalenych Čamadanavaj, u tym liku z tych, kaho jana sama pryvodziła, načalnikam pres-słužby iści nie zachacieŭ, znajšoŭšy bolš-mienš prymalnyja adhavorki.
Pryjšłosia šukać pa ŭsioj krainie — znajšli Sacharčuk. Imavierna varta čakać praciahu zakładzienaj infarmacyjnaj linii, ale biez samadziejnaści — u Sacharčuk nie stolki enierhii, jak u Čamadanavaj».
Čym ciapier žyvie hierainia stylovaha fota z Maršu žančyn 2020-ha8
Kamientary