9-hadovy chłopčyk stvaryŭ dadatak, jaki dapamahaje jaho małodšamu bratu z aŭtyzmam kamunikavać ź ludźmi
Šaścihadovy Adam Porter nie moh paprasić navat samyja prostyja rečy. Kali jamu było dva, u jaho dyjahnazavali aŭtyzm. Chłopčyk da apošniaha času amal zusim nie havaryŭ. Ale ciapier, karystajučysia dadatkam, jaki raspracavaŭ jaho 9-hadovy brat, Adam moža kamunikavać ź ludźmi, naciskajučy na karcinki. Šon Porter z Anhlii stvaryŭ prahramu dla dziaciej, jakija nie havorać i ŭ jakich dyjahnazavali aŭtyzm, paviedamlaje brytanski kanał ITV.
Usio pačałosia z taho, što Šona paprasili stvaryć hulniu dla školnaha prajekta, ale jon pajšoŭ dalej i stvaryŭ ceły dadatak. Chłopcu chaciełasia dapamahčy čałavieku, jakoha jon tak lubić.
«Kali b ja nie stvaryŭ taki dadatak, dyk nie viedaju, ci chto-niebudź inšy kali dadumaŭsia da takoha», — kaža Šon.
Viadoma, što pryblizna 40% dziaciej z aŭtyzmam nie havorać, i mohuć nikoli nie zahavaryć.
Baćka chłopčykaŭ, Lijam Porter, raskazvaje, što hety dadatak dapamoh małodšamu Adamu pačać raźvivacca chutčej. I Lijam spadziajecca, što z dapamohaj prahramy mnohija inšyja dzietki z aŭtyzmam zmohuć navučycca kamunikavać.
«Raniej my musili prosta zdahadvacca, čaho jon choča — jeści, skazać, dzie balić, paprasicca ŭ tualet», — kaža Lijam.
Ciapier, karystajučysia dadatkam Speak4me, Adam prosta naciskaje na karcinku, jakuju asacyjuje sa svaim stanam, a prahramka ahučaje jaho žadańnie. Naprykład, kali nacinuć na karcinku z łožkam, prahrama skaža «Ja chaču spać».
Hety dadatak adkryŭ mnohija mahčymaści dla Adama, i jon ciapier prosić bolš roznych rečaŭ dy raźvivajecca lepš. A jaho starejšy brat ciešycca i pryznajecca, što, zrabiŭšy dadatak Speak4me, «adčuvaje siabie prosta fantastyčna».
Kamientary