Dzieciam z ankacentra ŭ Maskvie pryvieźli ŭ padarunak ad papularnaj pieradačy pustyja skrynki
Pacyjenty ankałahičnaha centra imia Błachina ŭ Maskvie atrymali ŭ padarunak na Novy hod ad prahramy Pieršaha kanała «Modny pryhavor» pustyja skrynki. Pra heta ŭ Instahramie raspaviała vałanciorka Viktoryja Birukova.
Pavodle jaje słoŭ, hod tamu jana ŭdzielničała ŭ pieradačy, paśla čaho pradstaŭniki «Modnaha pryhavoru» prapanavali pieradać u ankacentr navahodnija padarunki dzieciam u ramkach dabračynnaj akcyi, piša meduza.io.
Ad prahramy ŭ balnicu pryjazdžali Dzied Maroz sa Śniahurkaj, jakija pakinuli čatyry miachi padarunkaŭ. «Jakoje ž było majo ździŭleńnie, dakładniej skazać — šok, kali ŭ miaškach apynulisia pustyja sety karobak, biez padarunkaŭ dzieciam! Šmat roznych naboraŭ karobak, składzienych pa pryncypie matroški — adna ŭ inšuju», — napisała Birukova.
Vałancior skazała, što arhanizatary akcyi pierad joj nijak nie paprasili prabačeńnia, tolki zajaviŭšy, što padarunki ŭ ich skrali i jany buduć źviartacca ŭ palicyju.
«Nie pieradać, jak mnie było horka i soramna za taki ŭčynak pieradačy… Rasčaravańnie ŭ ludziach, nierazumieńnie, čamu i jak tak možna było pastupić nie prosta ź dziećmi, a ź dziećmi, jakija zmahajucca za svajo kvołaje žyćcio… Ja nie viedaju, jak usio heta rastłumačyć. Jak pa mnie, taki ŭčynak — heta sapraŭdy pryhavor… tolki nie modny, a biesčałaviečny…»
Pradziusar «Modnaha pryhavoru» i hienieralny dyrektar kampanii «Čyrvony kvadrat» Illa Kryvicki paprasiŭ prabačeńnia za toje, što adbyłosia, i paabiacaŭ dasłać novyja padarunki 3 studzienia. U kamientaryi vydańniu «Padjom» jon zajaviŭ, što dzieciam padaryli pustyja karobki pamyłkova.
Ciapier čytajuć
Zamiest vajny słany ŭ novaj knizie Sašy Filipienki. I Maskva4
Kamientary