Try kampanii źviarnulisia da Litoŭskaj čyhunki, kab pieravozić biełaruski kalij u abychod sankcyj. Što pra ich viadoma?
Zastajecca tydzień da spynieńnia tranzitu pradukcyi «Biełaruśkalija» praź Litoŭskuju čyhunku ŭ suviazi z sankcyjami. Adnak pradstaŭnik litoŭskaj kampanii zajaviŭ, što kali pastupiać zajaŭki ad inšych klijentaŭ na pieravozku biełaruskich uhnajeńniaŭ, hruzavaja kampanija LTG Cargo budzie kansultavacca z admysłovaj uradavaj kamisijaj. Kab admović novym klijentam, pavinny być surjoznyja pravavyja arhumienty. Try biełaruskija kampanii ŭžo padali zajaŭki na pieravozku pradukcyi «Biełaruśkalija». Raskazvajem, što pra ich viadoma i ci mohuć jany trapić pad abmiežavańni za dapamohu padsankcyjnamu pradpryjemstvu.
Litoŭskaja čyhunka paviedamiła «Biełaruśkaliju» ab spynieńni tranzita z 1 lutaha. Pry hetym u kampanii ŭdakładnili: «Kali da nas pastupiać zajaŭki ad inšych klijentaŭ na pieravozku biełaruskich uhnajeńniaŭ, hruzavaja kampanija LTG Cargo budzie kansultavacca pa ich ź dziaržaŭnymi orhanami Litvy».
Kali abapiracca na Kanviencyju ab mižnarodnych pieravozkach pa čyhuncy, patrebnaja vielmi surjoznaja pryčyna, kab nie dać dazvoł žadajučym vazić hruzy praź Litvu. Litoŭskaja čyhunka źviarnułasia ŭ admysłovuju ŭradavuju kamisiju, jakaja zajmajecca pravierkaj ździełak pradpryjemstvaŭ, stratehična važnych dla ekanomiki krainy. Jana pavinna vyrašyć, ci nie pahražaje nacyjanalnym intaresam zaklučeńnie kantraktaŭ z kampanijami, jakija vyrašać padstrachavać «Biełaruśkalij». Pakul nieviadoma, jakoje rašeńnie pryniała kamisija.
Što za kampanii hatovyja padstavić plačo «Biełaruśkaliju»?
Tym časam Litoŭskaja čyhunka atrymała zajaŭki ad troch biełaruskich kampanij na pieravozku ŭhnajeńniaŭ «Biełaruśkalija» — heta «Biełaruskaja kalijnaja kampanija» (hatova da pieravozak užo z 24 studzienia), «Bielintertrans» i «Biełkali-Mihaa».
Abhruntoŭvajučy sankcyi, Minfin ZŠA nazvaŭ «Biełaruśkalij» «asnoŭnaj krynicaj padatkovych dachodaŭ i valutnaj vyručki dla režymu Łukašenki». «Biełaruśkalij» ekspartuje kalijnyja ŭhnajeńni praz manapolnaha trejdara — AAT «Biełaruskaja kalijnaja kampanija» (BKK).
Trejdar naležyć «Biełaruśkaliju» na 48%, astatnija akcyi, u Biełaruskaj čyhunki (42%) i strachavoj kampanii «Biełeksimharant» (10%). Pakolki ni Biełaruskaja čyhunka, ni «Biełeksimharant» nie znachodziacca pad sankcyjami ZŠA, BKK taksama pakul (da 1 krasavika) nie padpadaje pad ich (praviła 50%).
«Bielintertrans» — dziaržaŭnaja transpartna-łahistyčnaja kampanija, aficyjny ekśpiedytar Biełaruskaj čyhunki, ź filijałami va ŭsich abłasnych haradach i svaim łahistyčnym centram, terminałami i hruzavymi punktami. Prapanuje pieravozku kantejniernych hruzaŭ pa maršrutach Kitaj-Jeŭropa-Kitaj, «Manholski viektar» (Biełaruś-Rasija-Manholija), «Vikinh» (Litva-Biełaruś-Ukraina-Rumynija/Hruzija-Bałharyja-Turcyja, sa stykoŭkami ŭ partach), «Zubr» (Estonija-Łatvija-Biełaruś-Ukraina-Małdova). U 2019-m dla pašyreńnia mahčymaściaŭ ŭ Vrocłavie stvorany «Jeŭrazijski čyhunačny pieravozčyk», zadača — uzmacnieńnie ekspartnaha patencyjału biełaruskich pradpryjemstvaŭ (pašyreńnie hieahrafii pieravozki hruzaŭ čyhunačnym transpartam pa Jeŭropie ŭ samyja karotkija terminy).
«Bielintertrans» naležyć biełaruskaj dziaržavie i źjaŭlajecca adnym z najbujniejšych u krainie ekśpiedytarskich pradpryjemstvaŭ, — cytuje prezidenta Litoŭskaj nacyjanalnaj asacyjacyi ekśpiedytaraŭ i łahistaŭ «Lineka» Edmundasa Daukantasa Delfi. — Pakolki «Bielintertrans» dziejničaje pry padtrymcy dziaržavy, asablivych ciažkaściaŭ ź pieravozkami nie budzie. Łahistyčnaj dziejnaściu, chutčej za ŭsio, budzie zajmacca hałaŭnoje pradpryjemstva, a dla raźlikaŭ moža być zadziejničany i filijał u ES, naprykład, u Litvie. U biełaruskaha ŭrada jość vielmi dobraja zvyčka prysvojvać valutu — usie, navat dziaržaŭnyja pradpryjemstvy, imknucca mieć filijały ŭ ES, kab nie pampavać u Biełaruś valutnyja hrošy. A kab adkryć rachunak u ES, tut treba adkryć pradpryjemstva».
«Biełkali-Mihaa» — sumiesny zavod «Biełaruśkalija» i kitajskaj kampanii Migao, zapuščany ŭ 2019 hodzie. Heta pieršaje ŭ Biełarusi pradpryjemstva pa vytvorčaści nitrata kalija, jaki moža vykarystoŭvacca ŭ sielskaj haspadarcy (pryčym heta premijalny pradukt), a taksama mietałurhičnaj pramysłovaści, vytvorčaści škła, piratechniki i vybuchovych rečyvaŭ. Rynki zbytu — ES, Rasija, Turcyja, Kitaj i navat Aŭstralija. Kitajskija partniory dapamahajuć prasoŭvać tavar praz svaich dyleraŭ, asabliva ŭ Jeŭropu. Jak i ŭ vypadku z BKK, pradpryjemstva nie ŭklučanaje ŭ sankcyjny śpis.
Ci buduć nastupstvy?
Ci mohuć kampanii, jakija nie zakranuli sankcyi, trapić pad abmiežavańni za toje, što dapamahajuć «Biełaruśkaliju» z pastaŭkami pradukcyi? Mohuć, ale heta nie adbudziecca aŭtamatyčna, uviedzienyja sankcyi ŭsio ž dazvalajuć manioŭr dla «šerych schiem», i prykład tamu — pastaŭki rasijskaj nafty na padsankcyjny «Naftan». «Transnafta» zajaŭlaje, što bujnyja naftavyja kampanii Rasii nie pastaŭlajuć naftu na «Naftan», ale tym nie mienš zavod funkcyjanuje, praŭda, ciapier aficyjnaja statystyka pa handli naftaj i naftapraduktami zasakrečanaja. Nijakich nastupstvaŭ dla rasijskich pradpryjemstvaŭ pakul niama.
Nahadajem, letaś prezident ZŠA Džo Bajden padpisaŭ ukaz ab siektaralnych sankcyjach. Ukaz daje mahčymaść nakładvać błakirujučyja sankcyi (zamarozka dołaravych aktyvaŭ, zabarona na viadzieńnie biźniesu z amierykanskimi asobami) na lubyja biełaruskija struktury, jakija pracujuć u abaronnym siektary i siektary dziaržbiaśpieki, enierhietyčnym, kalijnym, tytuniovym, budaŭničym abo transpartnym siektarach Biełarusi. Minfin ZŠA papiaredziŭ, što lubyja kampanii, jakija pracujuć u nazvanych va ŭkazie Bajdena siektarach, mohuć być paśla ŭniesieny ŭ sankcyjny śpis.
Abmiežavańni suprać Biełarusi farmalna nie praduhledžvajuć aŭtamatyčnaje nakładańnie tak zvanych druhasnych sankcyj (pakarańnie kontrahientaŭ za ździełki z padsankcyjnymi kampanijami), ale ukaz daje prava ŭ budučyni ŭvodzić sankcyi suprać pradpryjemstvaŭ za «istotnaje sadziejničańnie abo pradastaŭleńnie finansavaj, materyjalnaj abo technałahičnaj padtrymki» u tym liku «Biełaruśkaliju».
«Hrošaj dla padtrymki zarpłat biudžetnikam nie budzie». Jak spynieńnie tranzitu kaliju paŭpłyvaje na ekanomiku
«Heta byŭ asnoŭny łahistyčny kalidor». Jak ciapier «Biełaruśkalij» budzie pastaŭlać pradukcyju na ekspart?
«Našy kampanii zmohuć prystojna zarabić na rynku ŭhnajeńniaŭ». Pucin sustreŭsia z hiendyrektaram «Urałchima»
Tur anansuje, što Łukašenku napišuć na vybarach bolš za 90%5
Kamientary