Vupi Hołdbierh adchilili ad tok-šou na dva tydni za vykazvańni pra Chałakost
Kiraŭnictva amierykanskaha telekanała AVS adchiliła aktrysu Vupi Hołdbierh ad udziełu ŭ tok-šou paśla jaje zajaŭ, što ŭ Chałakoście ŭdzielničali «dźvie hrupy biełych ludziej». ABC News paviedamiła, što Hołdbierh nie źjavicca ŭ efiry ciaham dvuch tydniaŭ.
U zapiscy dla piersanału, raspaŭsiudžanaj u aŭtorak viečaram, prezident ABC News Kim Hodvin napisała: «Ja adchilaju Vupi Hołdbierh na dva tydni za jaje niasłušnyja i abraźlivyja słovy. Rašeńnie ŭstupaje ŭ siłu nieadkładna. Usia ABC News salidarnaja z našymi habrejskimi kalehami, siabrami, siemjami i supołkami».
Pryčynaj skandału stali słovy Hołdberh padčas tok-šou na telekanale ABC u paniadziełak. 66-hadovaja ŭładalnica «Oskara» zajaviła, što hienacyd habrejaŭ u hady Druhoj suśvietnaj vajny źviazany ź biesčałaviečnym staŭleńniem adnoj hrupy biełych ludziej da inšaj, ale ŭ hetym nie było rasavaj padaploki, piša Bi-bi-si.
Aktrysa, jakaja zdymajecca ŭ prahramie The View z 2007 hoda, zahavaryła ab hetaj prablemie, abmiarkoŭvajučy zabaronu školnaj rady štata Tenesi na pakaz hrafičnaha ramana pra Chałakost na toj padstavie, što ŭ im pakazanyja aholenyja cieły, jość nienarmatyŭnaja leksika i pakazanyja samahubstvy.
«Mianie ździŭlaje, što vas źbiantežyła mienavita toje, što ŭ knizie jość aholenaść. U pieršuju čarhu heta tvor ab Chałakoście, ab zabojstvie šaści miljonaŭ čałaviek, heta nie źbiantežyła vas? — zajaviła Hołdberh padčas tok-šou. — Davajcie kazać sumlenna. Chałakost nie tyčycca rasavych pytańniaŭ. Nie, heta nie pra rasu».
Suviadučaja prahramy Džoj Biechar pasprabavała pierakanać Hołdbierh, adznačyŭšy, što nacysty ličyli habrejaŭ pradstaŭnikami nižejšaj rasy. Adnak aktrysa stajała na svaim: «Nie, heta nie pra rasu. Nie. Sprava ŭ nialudskaści adnych u dačynieńni da inšych».
«Heta pra pieravahu biełych, heta pra pieraśled habrejaŭ i cyhan», — dadała suviadučaja Ana Navara. «Ale havorka idzie ab dvuch hrupach biełych ludziej», — adrezała Hołdbierh.
Kamientary