Raspaviadajučy pra sumnyja pierśpiektyvy amierykanskaj valuty, Alaksandr Łukašenka adznačyŭ, što chutka biełarusy buduć zmahacca, «kab u kišeni byŭ lišni rasijski rubiel ci juań». «Naša Niva» spytała ŭ ekanamista, ci varta vystrojvacca ŭ čarhu pa kitajskuju valutu.
Kolki kaštuje juań?
Zhodna z kursam Nacbanka, 10 juaniaŭ kaštujuć 5,1107 biełaruskaha rubla. Tańniej za ŭsio nabyć kitajskuju valutu možna pa 5,8 rubla.
Na suśvietnych rynkach za adzin dalar dajuć 6,36 juania. Za adzin jeŭra — 7,01 juania.
U Minsku kitajskuju valutu pradajuć u niekatorych adździaleńniach Biełarusbanka, BiełVEBa, MTBanka, Biełahraprambanka, Biełhazprambanka i Fransabanka.
Ci moža juań stać papularnym siarod biełarusaŭ?
Navukovy supracoŭnik BEROC Źmicier Kruk adznačaje, što juań źjaulajecca dastatkova raspaŭsiudžanaj valutaj u śviecie, jakaja z 2016 hoda ŭvachodzić u śpis piaci reziervovych valut MVF. Ale tolki hetaha nie dastatkova, kab juań chutka staŭ papularnym u Biełarusi.
«Va ŭmovach, kali nabyć dalar ci jeŭra budzie niemahčyma, kuplać juań, mahčyma, budzie mieć sens. Ale kali my kažam pra fizičnych asob, to ŭ nas uźnikaje pytańnie, nakolki apieratyŭna my zmožam pradać ci kupić hetuju valutu».
Ekśpiert sumniajecca, ci jość u Biełarusi dastatkovaja kolkaść najaŭnaj kitajskaj valuty, kali raptam na fonie niedachopu najaŭnych dalaraŭ ci jeŭra na jaje ŭźniknie vialiki popyt z boku nasielnictva. I ci jość techničnyja mahčymaści na taki popyt reahavać.
«Kab zabiaśpiečyć likvidnaść siehmientu rynku (mieć mahčymaść apieratyŭna kupić ci pradać valutu pa prymalnym kursie), treba mieć adpaviednyja damovy z kitajskimi bankami. Prynamsi z taho, što my bačym u publičnaj prastory, nijakich krokaŭ u hetym kirunku pakul zroblena nie było.
Druhi aśpiekt ŭ mierkavańniach likvidnaści ŭ tym, nakolki daviarajuć hetaj valucie. Kab niešta niepapularnaje siońnia, stała papularnym zaŭtra, treba, kab ludzi ŭklučylisia ŭ praces. Hruba kažučy, my zaŭsiody hladzim na susieda. Kab ja pavieryŭ u juań u Biełarusi, ja pavinien pierakanacca, što ŭ jaho vierać inšyja. Tamu heta nie prosty i praciahły praces.
Troški inakš vyhladaje situacyja ź jurydyčnymi asobami, asabliva, kali jany majuć niepasrednyja znosiny z Kitajem. U takich vypadkach kupla kitajskaj valuty moža mieć bolšy sens, čym dla fizičnych asob».
Nakolki heta ŭstojlivaja valuta?
Ekśpiert nazyvaje mahčymyja valutnyja ryzyki, źviazanyja ź istotnymi chistańniami kursu juania ŭ dačynieńni da hałoŭnych suśvietnych valut.
«Z adnaho boku, Kitaj — hałoŭny eksparcior. I kali b tam byŭ bolš rynkavy padychod, to juań u minułyja hady by bolš uzmacniaŭsia. Strymlivańnie ŭmacavańnia kursu juania źjaŭlajecca asnoŭnaj pretenzija da Kitaja z boku raźvitych krain.
Ź inšaha boku, u biahučych varunkach isnujuć ryzyki z-za infarmacyi nakont taho, što kitajskija ŭłady ŭskosna mohuć ci padtrymlivajuć napad Rasii na Ukrainu. Paśla ahučvańnia hetaj zajavy amierykanskaj administracyjaj na suśvietnych rynkach infarmacyja ŭsprymałasia, jak pahroza ŭviadzieńnia niejkich sankcyj da Kitaja. Heta pryviało da taho, što niekalki dzion tamu adbyłasia istotnaje skaračańnie fondavych indeksaŭ Kitaja, źnižeńnie koštaŭ ich akcyj.
Bolš za toje isnujuć i adčuvalnyja ryzyki dla ekanomiki Kitaja i pierśpiektyvaŭ juania pa vyklučna ekanamičnych unutranych pryčynach. Jość davoli istotnyja zaściarohi defołtu bujnych kampanij i finansavych uzrušeńniaŭ u Kitai. Takoha kštałtu zaściarohi robiać niehatyŭnyja scenary dla ekanomiki naohuł. U vyniku heta moža niehatyŭna adbicca i na juani», — padsumavaŭ ekśpiert.
Kamientary