Novyja sankcyi Jeŭrasajuza ŭklučać stal, pradmiety raskošy, reaktyŭnaje paliva… Ale nie naftu i haz

Ciapier błok pracuje nad piatym pakietam sankcyj suprać Rasii, jaki, jak čakajecca, budzie ŭchvaleny ŭžo na hetym tydni. Dvoje čynoŭnikaŭ ES, jakija zachacieli zastacca ananimnymi, paviedamili CNBC, što prapanova pa nastupnym pakiecie sankcyj uklučaje lizinh samalotaŭ, stalovyja vyraby, pradmiety raskošy i reaktyŭnaje paliva.

Abiedźvie krynicy dadali, što pakiet usio jašče praciahvaje farmavacca i moža źmianicca, pakolki pieramovy praciahnucca ŭ najbližejšyja dni, napiaredadni važnaj sustrečy pasłoŭ ES u sieradu.

Adzin z čynoŭnikaŭ dadaŭ, što «vidavočna, mnohich składnikaŭ nie chapaje», majučy na ŭvazie adsutnaść zachadaŭ u dačynieńni da rasijskaha enierhietyčnaha siektara.

Prezident Francyi Emaniuel Makron zajaviŭ u paniadziełak, što ES pavinien damovicca ab abmiežavańni rasijskaj nafty i vuhalu paśla źvierstvaŭ, jakija rabilisia ŭ Bučy. Polšča jašče ŭ minułym miesiacy abviaściła, što spynić impart rasiejskaha vuhalu. Ale jość i hrupa krain ES, jakija ŭsio jašče suprać uchvaleńnia lubych enierhietyčnych sankcyj.

«My chočam być mienš zaležnymi ad impartu rasijskich enierhanośbitaŭ u Jeŭrapiejski Sajuz, i Hiermanija padtrymaje dalejšyja sankcyi suprać Rasii», — zajaviŭ ministr finansaŭ krainy Kryścijan Lindnier u intervju CNBC u Luksiemburhu ŭ paniadziełak.

«My pavinny bolš cisnuć na Pucina, i my pavinny izalavać Rasiju. My pavinny skaracić usie ekanamičnyja stasunki z Rasijaj, ale na hety momant niama mahčymaści skaracić pastaŭki hazu», — dadaŭ jon. 

Adkazvajučy na pytańnie, ci pavinien na dadzieny momant, jak prapanavaŭ Makron, ES prasoŭvacca napierad z sankcyjami na naftu i haz, Lindner skazaŭ: «Ad mianie — nijakich śpiekulacyj».

Jahony aŭstryjski kaleha taksama byŭ suprać uviadzieńnia zabarony na rasijski haz. 

«Aŭstryja nie vystupaje za novyja sankcyi ŭ dačynieńni da hazu. My vielmi mocna zaležym ad rasijskaha hazu, i ja dumaju, što ŭsie sankcyi, jakija ŭdaryli pa nas bolš, čym pa ruskich, nie byli b karysnymi dla nas. Voś čamu my suprać sankcyj u dačynieńni da nafty i hazu», — zajaviŭ fiederalny ministr finansaŭ Aŭstryi Mahnus Brunier u intervju CNBC.

Pavodle acenak Jeŭrapiejskaha statystyčnaha ŭpraŭleńnia, Aŭstryja impartavała amal 59% svajho pryrodnaha hazu z Rasii na praciahu 2020 hoda. Bałharyja, Čechija, Łatvija i Vienhryja impartavali jašče bolšuju dolu pryrodnaha hazu z Rasii ŭ tym ža hodzie, pa dadzienych Jeŭrastata.

Raniej u paniadziełak pradstaŭnik Jeŭrakamisii zajaviŭ, što praces padrychtoŭki novych sankcyj źjaŭlajecca «kanfidencyjnym». «My nikoli nie kamientujem biahučyja pracesy», — dadaŭ pres-sakratar.

Lubyja novyja sankcyi patrabujuć adnadušnaj zhody členaŭ Jeŭraźviaza.

• 0
• 0
• 1
• 5
• 0
• 4
• 1
• 0