Kožnuju zimu kažanam, jakija trapili ŭ biadu, dajuć prytułak vałanciory reabilitacyjnaha centra «Kažanapolis». Učora krychu bolš za 20 kažanoŭ paśla doŭhaj śpiački adpuścili na volu. Fotarepartaž publikuje Onlíner.
Kali koratka, žyvioł u centr pieradajuć zvyčajnyja hramadzianie, a vałanciory ŭžo zajmajucca zdaroŭjem źviarkoŭ. Kali rukakryłaha pieradali ŭ centr u chałodnuju paru hoda, naprykład poźniaj vosieńniu, to zimavać asobina budzie ŭ łabaratoryi. Dakładniej, u bytavym chaładzilniku.
U chaładzilnik myšej źmiaščajuć u miašočkach z zaviazkaj i padviešvajuć da viasny. Kožnyja paru tydniaŭ žyvioł ahladajuć, uzvažvajuć, pry nieabchodnaści adkormlivajuć.
Dziŭna, ale ludzi da hetaha času vierać, što kažany — heta simvał śmierci, niedabity niekalki stahodździaŭ tamu vampir. Adnak adzinaja niebiaśpieka ad kažanoŭ dla čałavieka — heta šalenstva. Ahresiŭnaja stadyja chvaroby ŭ ich adsutničaje, to jość kidacca i kusacca jany nie stanuć. Tamu pry sustrečy prosta nadzieńcie toŭstuju palčatku — hetaha budzie dastatkova dla znajomstva.
U toj ža čas kažany hrajuć značnuju rolu dla ekałohii. Jany siłkujucca kazurkami, likvidujuć mošak i kamaroŭ u vielizarnych kolkaściach — za noč źjadajuć da 50% nasiakomych ad masy svajho cieła.
U kancy sakavika — pačatku krasavika źviarkoŭ adpuskajuć na volu. Na žal, pračnulisia nie ŭsie asobiny. Pryčyn šmat, ale ŭ asnoŭnym heta chvaroby. Na «ŭźlotku» zaołah centra Alaksiej Špak pryvioz istot u pieranoscy.
U apošnija hady rukakryłych adpuskajuć ź niejkaj uračystaściu. Dzieciam navat dazvalajuć patrymać źviarka ŭ rukach, i ciapier jany razumiejuć: myš im nie vorah.
Tut byli roznyja asobiny: rudyja i ciomnyja, badzioryja i sonnyja, pisklavyja i saramlivyja — ale z chaładzilnika ŭ dzikuju pryrodu viarnuli ŭsich. Adpuskali myšej z dałoni: ich nielha padkidvać. Kali źviarok sahreŭsia i raźmiaŭ kryły, jon sam uźlataje z ruki, karystajučysia spadarožnym vietram. Ale na palot byli nastrojenyja nie ŭsie, chtości čepkimi łapkami karaskaŭsia pa stvale dreva.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary