Vysokapastaŭlenyja biełaruskija kantrabandysty stracili jašče 2 miljony dalaraŭ
Havorka nie ab pačkach: kantrabandnyja cyharety ź Biełarusi praciahvajuć adpraŭlać u ES vahonami i furami.
Na minułym tydni pamiežniki čyhunačnaha pasta ŭ Kianie (nasuprać Hudahaja ź litoŭskaha boku) zatrymali dva hruzy nielehalnych cyharet. Bolš za 100 000 pačkaŭ nielehalnych cyharet było znojdziena ŭ vahonach z draŭnianymi hranułami i vuhalem, piša Delfi.lt.
Pieršy ciahnik z draŭnianymi hranułami ŭ Kianu pryjechaŭ u minuły čaćvier. Mytniki pravieryli vahony i ŭ pieršym prosta na hranułach znajšli skryni ź biełaruskimi cyharetami. Usiaho 150 skryń (75 000 pačkaŭ) cyharet Minsk City, Fest 7 i Fest.
Druhi kantrabandny hruz byŭ zatrymany ŭ noč z čaćviarha na piatnicu. Padčas pravierki ciahnika ź Biełarusi z vuhalem pad im znajšli zakapanyja karobki z cyharetami — 73 skryń (36 500 pačkaŭ) cyharet Fest. Viadziecca rasśledavańnie. Košt abodvuch nielehalnych hruzaŭ z usimi padatkami — bolš za 400 000 jeŭra.
Adnačasova polskija mytniki kanfiskavali amal 700 000 pačkaŭ biełaruskich cyharet, schavanych u fury, jakaja jechała ź Litvy ŭ Polšču.
Pry praviercy fury na polskich numarach vyśvietliłasia, što za niekalkimi draŭlanymi paletami znachodziacca karobki z cyharetami. Kali ŭvažliva pahladzieć na fota i videa, to možna zaŭvažyć, što ŭ fury znachodzilisia skrynki z cyharetami vytvorčaści dziaržaŭnaj fabryki «Nioman», siarod inšaha možna zaŭvažyć pački cyharet Minsk.
Košt kantrabandy z padatkami aceńvajecca ŭ bolš čym 10 młn złotych (2,3 młn dalaraŭ).
Biełaruś — kraina tatalnaha kantrolu nad hramadstvam, u tym liku šlacham videanazirańnia, tamu zahruzka cełych vahonaŭ cyharetami nie moža adbyvacca biez apieki vysokich struktur.
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja46
Kamientary