U Biełarusi vyraśli normy biaspošlinnaha ŭvozu bahažu na miažy. Voś novyja praviły
Da ŭčarašniaha dnia dziejničali raniejšyja normy: pry pierasiačeńni miažy nie na samalocie i nie pieššu možna było ŭvozić bahaž koštam da 500 jeŭra i vahoj da 25 kh. Novyja normy — 1000 jeŭra i 31 kh, piša Onliner.
A što z normaj u 300 jeŭra pry pryvatnych pieramiaščeńniach?
Šmat chto pamiataje, što z krasavika 2016 hoda dziejničała norma dla tych, chto pierasiakaje miažu čaściej, čym raz na try miesiacy, — jany mahli biaspošlinna ŭvozić tavary na 300 jeŭra vahoj nie bolš za 20 kh. Hetaja norma była admieniena ŭ 2020 hodzie ŭkazam numar 146. Stała možna vazić «pa 500» i čaściej.
Kolki treba płacić za pieravyšeńnie?
Kali vaha tavaraŭ budzie vyšejšaja za normu, pošlinu paličać pa 4 jeŭra za kožny lišni kiłahram. Kali pieravyšeńnie budzie pa košcie, to raźlik prosty: ad sumy tavaraŭ adnimuć 1000 jeŭra i na reštu naličać pošlinu ŭ pamiery 30%.
Što budzie ŭ vypadku pieravyšeńnia i pa tym, i pa inšym paramietry? Supracoŭniki mytni buduć hladzieć, u jakim vypadku pošlina budzie vyšejšaja, tuju sumu i vystaviać.
Što možna vazić i jak časta
Mnohija pamiatajuć, što DMK kaliści praanalizavaŭ termin ekspłuatacyi niekatorych rečaŭ i źvioŭ asobnyja najmieńni ŭ tablicu. Naprykład, televizar možna było pravozić raz na try hady. A šyny — raz na dva. Ciapier normy inšyja. Televizar možna vazić užo kožny hod, a telefonaŭ — adrazu pa dva na hod (nie zabyvajcie pra stol koštu i vahi).
Kolki hrošaj možna pieravozić?
Uličvajučy, što biełarusa mohuć čakać prablemy z kartkami, varta padstrachavacca hatoŭkaj. Tut praviły nie źmianilisia: nikomu nie pakazvajučy, pravozicie hrošy na sumu nie bolš za 10 tysiač dołaraŭ. Kali bolš — treba dekłaravać.
Kolki buduć dziejničać novyja praviły?
U rašeńni padkreślivałasia, što novyja praviły — heta časovaja norma, jakaja budzie dziejničać da 1 kastryčnika 2022 hoda.
Ciapier čytajuć
Cichanoŭski: Łukašenku treba sudzić pa łukašysckich zakonach, ale pasadzić na koł36
Kamientary