Razietki z aniołami, u domie Čyža, ź vidam na Dom urada. Kolki kaštujuć i jak vyhladajuć samyja darahija kvatery Minska
Ekśpierty rynku nieruchomaści kažuć pra značnaje skaračeńnie kolkaści ździełak i padzieńnie cenaŭ na žytło. Pa ich nazirańniach, ad pačatku vajny kvatery ŭ siarednim patańnieli na 10%, a kali havorka idzie pra darahi siehmient ci chutki prodaž, to minus 20% ad davajennaj cany. «Naša Niva» pahladzieła, kolki ciapier kaštujuć samyja darahija kvatery ŭ stalicy.
Samaja darahaja kvatera ŭ «Domie Čyža»
Na biahučy momant u Minsku pradajecca krychu bolš za 20 kvater koštam ad adnaho miljona dalaraŭ.
Samaja darahaja aceniena ŭ $1 950 000. Stolki prosiać za 4-pakajovuju kvateru ŭ domie kala Trajeckaha pradmieścia, jaki ŭ narodzie nazyvajuć «domam Čyža».
Ahulnaja płošča — 260,8 m², žyłaja — 128,8 m².
«Raskošnaja 4-pakajovaja kvatera z nadzvyčajnym vidam na nabiarežnuju Śvisłačy i centr horada», — tak pačynajecca apisańnie apartamientaŭ amal za dva miljony dalaraŭ.
Kvatera pradajecca z meblaj. U pamiaškańni zrobleny vytančany dyzajnierski ramont, u azdobie tolki naturalnyja materyjały. Žyllo pradajecca razam z meblaj italjanskaj vytvorčaści i niamieckaj technikaj Siemens i Liebher.
Cikava, što ŭ čatyrochpakajoŭcy jość adrazu čatyry sanvuzły.
«Razynačkaj adnaho z sanvuzłoŭ źjaŭlajecca raskošny chamam z zornym niebam», — havorycca ŭ apisańni.
«Unikalny prajekt u centry Minska»
Krychu tańniej pradajecca dvuchuzroŭnievaja kvatera u novabudoŭli pa adrasie vulica Miaśnikova, 25. Kvateru z ahulnaj płoščaj u 528,46 m² aceńvajuć u $1 834 280.
«Unikalny prajekt u centry Minska. Dvuchuzroŭnievyja apartamienty z terasaj na dachu źjaŭlajucca idealnym varyjantam dla pražyvańnia paśpiachovych sučasnych ludziej», — z hetych słoŭ pačynajecca abjava.
Kvatera pradajecca biez mebli i techniki. Zatoje, padobna, z marmurovaj padłohaj.
Na pieršym uzroŭni — kuchnia-haścioŭnia-stałovaja z vychadam na vialikuju terasu, dźvie vialikija spalni z vannym pakojem i harderobnaj, haściavy sanvuzieł, «padsobka».
Na druhim uzroŭni — pakoj z vannaj i harderobnaj, vialikaja terasa na dachu ź vidam na horad.
Niahledziačy na toje, što hetaja kvatera pa płoščy ŭ dva razy bolšaja za papiaredniuju, kolkaść sanvuzłoŭ u joj mienšaja. Ich tut try.
Adzinaja kvatera na paviersie
Treciaja pa darahoŭli kvatera ŭ Minsku vystaŭlena na prodaž za 1,8 miljona dalaraŭ. Znachodzicca jana pa adrasie praśpiekt Pieramožcaŭ, 135B (kompleks — D3).
Za hetyja hrošy vy možacie nabyć šaścipakajoŭku ahulnaj płoščaj 270,2 m². Apartamienty mieściacca na 26-m paviersie. Faktyčna vy nabyvajecie ceły pavierch, bo vaša kvatera budzie adzinaj na im. U joj try sanvuzły, čatyry bałkony i harderobnaja.
Z panaramnych voknaŭ adkryvajecca vid na vadaschovišča. Kvatera z novym ramontam, całkam meblavanaja. Majecca zakryty parkinh z aciapleńniem.
«Nabyvajučy kvateru ŭ D3, vy atrymlivajecie nie prosta kvadratnyja mietry, a ceły śpiektr pamiaškańniaŭ i rašeńniaŭ dla novaha adčuvańnia jakaści žyćcia», — tak apisvajuć hety žyllovy kompleks pradaŭcy.
Kavałak dachu i panaramnyja vokny
Jašče adna niejmavierna darahaja kvatera pradajecca ŭ ŽK «Hrafit» za $1 672 090.
«Panaramnyja vokny nadajuć budynku sučasny vyhlad i dajuć šmat naturalnaha śviatła. U azdableńni ŭdała spałučajucca sučasnyja ekałahičnyja pryrodnyja materyjały — kamień i dreva», — havorycca ŭ apisańni. Jak i ŭ vypadku z apartamientami ŭ susiednim budynku na Miaśnikova, 25, žytło pradajecca biez techniki i mebli.
Vitaja leśvica viadzie na terasu, jakaja znachodzicca na dachu budynka.
Śvisłackaje rakako
Roŭna za paŭtara miljona dalaraŭ vystaŭlena na prodaž 6-pakajovaja kvatera, jakaja mieścicca na 12-m paviersie ŭ «domie Čyža».
Ahulnaja płošča — 309,5 m², žyłaja — 204,9 m². Tut jeść čatyry łodžyi, dva bałkony i čatyry sanvuzły.
«Kvatera vykanana ŭ kłasičnym styli pa indyvidualnym dyzajn-prajekcie», — napisana ŭ abjavie.
Ramont byŭ zrobleny ŭ 2019 hodździe. U apisańni kažacca, što pierad praviadzieńniem rabot rabili poŭny demantaž tynkoŭki i ściažki. Majecca sistema rekupieracyi pavietra z ačystkaj i padahrevam da pakajovaj tempieratury, a taksama 6-zonnaja sistema kandycyjanavańnia Hisense z prytokam śviežaha pavietra. Vykarystany stolevy rośpis.
Adznačana, što haspadar kvatery pražyvaŭ u joj nie bolš za try miesiacy na hod.
Kvatera bahataja na mastackija elemienty. Pryčym nie tolki ŭ vyhladzie pałocien na ścienach ci malunkaŭ na stoli, ale i ŭ rośpisie batarei. Šmat pazałoty, aniołaŭ — u dyzajnieraŭ atrymaŭsia chutčej zakos pad rakako ź jaho mudrahielistaściu, čym pad kłasicyzm.
Čytajcie jašče:
«Ryełtary choram kažuć, što narod pakul u stupary». Što adbyvajecca na rynku nieruchomaści
U ZŠA idzie padlik hałasoŭ. Tramp pakul lidziruje z vynikam 178 na 99
Kamientary