Hulcy «Šachciora» i «Dynama» pabilisia na poli paśla matča, a BATE ŭpieršyniu ŭ siezonie nie zabiŭ. Čym zapomniŭsia vośmy tur Vyšejšaj lihi pa futbole?
Čempijon krainy i bronzavy pryzior minułaha pieršynstva vyznačali macniejšaha nie tolki na poli, ale i na kułakach. Salihorsk pieramoh — i abyšoŭ minčukoŭ u tablicy. Da taho ž «harniaki» skaracili adstavańnie ad lidara lihi, jaki zhubiŭ ački ŭ Žodzinie z-za anamalnaj dla Barysava «nulavoj» realizacyi.
Tašujeŭ znoŭ skaryŭ «bieła-błakitnych»
Minskaje «Dynama» vypraŭlałasia na stadyjon «Budaŭnik» ź sieryjaj u 11 sustreč biez paraz u aktyvie. Da taho ž staličnyja futbalisty padčas pieršynstva-2022 niaźmienna pieramahali, kali hulali ŭ haściach. Tamu sustreča z čempijonam krainy ŭ Salihorsku kamandu Arcioma Čaladzinskaha nie vielmi strašyła.
A darma, bo napiaredadni padnačalenyja Siarhieja Tašujeva dva tury zapar damahalisia minimalnaha pośpiechu na samych apošnich chvilinach dvuboja. Da taho ž rasijski trenier nikoli ŭ karjery «Dynama» nie sastupaŭ. I mieŭ namier nadalej praciahnuć trend.
Zbolšaha ŭ nastaŭnika harniakoŭ heta atrymałasia. «Šachcior» ciaham viečara vyhladaŭ bolš pryvabna, cisnuŭ bolš istotna i čaściej stvaraŭ niebiaśpieku la bramy haściej. Adnak zabić «Šachcioru» daviałosia tolki raz — dy znoŭ u dadadzieny čas. Na 95-j chvilinie haspadary zarabili pienalci, jaki realizavaŭ Darba.
Z boku minčan pryznačeńnie adzinaccacimietrovaha vyklikała chvalu abureńnia. Kali ž paśla finalnaha śvistka vyśvietliłasia, što hoł staŭ adzinym u matčy, dynamaŭcy praciahnuli sprečki — adnak užo nie tolki z arbitrami, ale i z supiernikami.
Sutyčki na słovach pierajšli ŭ kułačnuju bojku, pa vynikach jakoj dynamaviec Aryńja atrymaŭ žoŭtuju kartku, a hulec «Šachciora» Šatara — vydaleńnie.
Dadamo, što pieramoha harniakoŭ dapamahła im abyści «Dynama» ŭ turnirnaj tablicy — i prabicca na treci radok.
BATE ŭpieršyniu ŭ siezonie nie zabiŭ
Rymejk čverćfinała Kubka Biełarusi, dzie pieramahli barysaŭčanie, u ramkach pieršynstva vyjšaŭ dla lidara pieršynstva mienš pryvabnym. BATE za 90 chvilin tak i nie zdoleŭ zasmucić hieahrafičnych susiedziaŭ — i ŭpieršyniu u čempijanacie pakinuŭ pole biez hałoŭ. Adnak u «žoŭta-błakitnych» jość apraŭdańnie: z 44-j chviliny jany hulali ŭ mienšaści z-za vydaleńnia Miliča.
«Tarpieda» ž vynik, biezumoŭna, moža zanieści sabie ŭ aktyŭ. Jak minimum tamu, što druhuju sustreču zapar žodzincy nie prapuścili, chacia da hetaha ŭ šaści sustrečach dastavali miač ź sietki 11 razoŭ.
Brest u kryzisie
Upieršyniu ŭ historyi kamanda ź bierahoŭ Buha pačynaje pieršynstva z vaśmi sustreč bieź pieramoh. Na tydni «Dynama» padzialiła ački z «Biełšynaj», što tolki-tolki ŭźniałasia z dyvizijona ranham nižej. Da taho ž «bieła-błakitnyja» prapuścili pieršymi — i ŭratavalisia tolki dziakujučy hołu Araškieviča.
Pakazalna, što kryzis «bieła-błakitnych» ciahniecca ažno ź minułaha siezona.
Paśla valavoj pieramohi nad «Tarpieda» ŭ 20-m tury čempijanata-2021 kamanda praviała 18 sustreč, ź jakich uziała vierch tolki adnojčy!
Vidavočna, što «Dynama» patrabujucca radykalnyja źmieny, inakš čempijon-2019 ryzykuje pakinuć elitny dyvizijon.
Astatnija sustrečy vośmaha tura skončylisia nastupnym čynam:
- «Viciebsk» — «Homiel» — 1:1
- «Enierhietyk-BDU» — «Minsk» — 2:0
- «Isłač» — «Słavija» — 0:2
- «Słuck» — «Dniapro» — 2:2
- «Nioman» — «Arsienał» — 2:0
Turnirnuju tablicu ŭznačalvaje BATE z 20 ačkami, druhoje miesca za «Enierhietykam» — 18 bałaŭ, treci radok dzielać «Šachcior» i minskaje «Dynama», u jakich pa 15 ačkoŭ.
Cichanoŭskaja i Zialenski ŭpieršyniu praviali sustreču. Zialenski zaprasiŭ Śviatłanu ŭ Kijeŭ14
Kamientary