U čatyroch abłaściach upieršyniu pa aficyjnaj statystycy ŭpali realnyja dachody nasielnictva
U Biełarusi praciahvaje zapavolvacca rost realnych dachodaŭ nasielnictva. Hety pakazčyk u pieršym kvartale vyras na ścipłyja 0,2% da anałahičnaha pieryjadu 2021-ha, vynikaje sa źviestak Biełstata. I kali ŭ cełym pa krainie realnyja dachody nasielnictva znachodziacca ŭ plusie, to ŭ čatyroch abłaściach jany ŭpali. Heta źviazana z rostam inflacyi. Na hetym fonie biełarusy dziasiaty miesiac zapar bolš aktyŭna zdajuć valutu ŭ abmieńniki, čym kuplajuć, paviedamlaje Zerkalo.io.
Realnyja dachody nasielnictva ŭ pieršym kvartale ŭpali ŭ Mahiloŭskaj vobłaści — na 2,5% da anałahičnaha pieryjadu 2021-ha, u Viciebskaj — na 2,1%, u Hrodzienskaj — na 0,9%, a taksama ŭ Bresckaj — na 0,8%. U Minsku hety pakazčyk vyras na 2,2%, u Homielskaj vobłaści — na 0,2%, a ŭ Minskaj vobłaści — na 0,1%. Padzieńnie realnych dachodaŭ nasielnictva ŭ asobnych rehijonach adbyłosia ŭpieršyniu za apošnija 5 hadoŭ.
Dla paraŭnańnia: u pieršym kvartale 2021-ha realnyja dachody nasielnictva pavialičylisia na 2,8%, 2020-ha-na 7,3%, 2019-ha — na 7,2%, 2018-ha — na 7,8%. U apošni raz padzieńnie hetaha pakazčyka ŭ pieršym kvartale było ŭ 2017 hodzie, tady źnižeńnie skłała 1,7%.
Premjer-ministr Biełarusi napiaredadni zajaviŭ, što ŭ krainie niama padzieńnia realnych dachodaŭ nasielnictva, a dziaržavaj svoječasova vykonvajucca ŭsie sacyjalnyja abaviazacielstvy, a «ekanomika Biełarusi ciapier adčuvaje siabie całkam vydatna».
«Tym nie mienš my razumiejem, što patrebnaja budzie vielmi surjoznaja praca dla taho, kab nie dać situacyi pahoršycca i, pa mienšaj miery, vyjści na tyja ž paramietry pracy, jakija byli ŭ minułym hodzie da ŭviadzieńnia hetaha surjoznaha sankcyjnaha pakieta», — skazaŭ premjer-ministr.
U ahulnym abjomie hrašovych dachodaŭ apłata pracy zajmaje 64,5%, dachody ad pradprymalnickaj i inšaj dziejnaści, jakaja prynosić dachod, — 7,6%, tranśfierty nasielnictvu (piensii, dapamoha, stypiendyi i inšyja) — 22,8%, dachody ad ułasnaści i inšyja dachody — 5,1%, vynikaje sa źviestak Biełstata.
Kamientary