Vakarčuk prezientuje ŭ Biełarusi solny dysk «Unačy»

5 vieraśnia ŭ harnałyžnym centry «Siličy» kala Łahojska prajšoŭ fiestyval «Rok za Babroŭ». Chedłajnieram vystupiŭ ukrainski hurt «Akijan Elzy». Pierad vystupleńniem frontmen kalektyva Śviatasłaŭ Vakarčuk zładziŭ dla žurnalistaŭ pres-kanfierencyju. Muzyka vykazaŭsia…

...pra ŭkrainskuju movu

– Ja śpiavaju na ŭkrainskaj, bo heta maja rodnaja mova. Pytańnie ŭ tym, nakolki peŭnaja mova źjaŭlajecca naturalnaj dla ciabie.

Pra svaje dyski

Z prezientacyjaj solnaha dyska «Unačy» Vakarčuk paabiacaŭ pryjechać u Biełaruś uvosień. Pra padrabiaznaści pakul nie raspaviadaje, bo sam ničoha dakładna nie viedaje. Kancerty, mahčyma, projduć nie tolki ŭ Minsku, ale i ŭ inšych haradach.

Raskazaŭ muzyka i pra novy albom «Akijana Elzy», nad jakim idzie praca.

– Na im budzie bolš na adnu ci na dźvie pieśni, čym zvyčajna. My zasumavali pa studyi. Siadzim ciapier u joj try miesiacy. I nijak nie možam vyjści. Ale praces idzie. Heta budzie padobna da taho, kali my hrali «Ja na niebie byŭ» i «Madel». Tam nie budzie składanych aranžyrovak. My zachacieli zrabić rock-n-rollny albom. Mnie heta nahadvaje «Akijan Elzy», jaki byŭ vosiem hadoŭ nazad.

Pra «Jeŭrabačańnie»

– «Jeŭrabačańnie» – heta cudoŭnaja mahčymaść dla ludziej, jakija vyvučajuć palityčnuju kartu Jeŭropy, ubačyć chto jość chto, chto z kim siabruje, chto kaho padtrymlivaje. Ci jość inšyja momanty, jakija kaho-niebudź cikaviać, ja nie ŭpeŭnieny. U krainach Uschodniaj Jeŭropy, pakolki ničoha inšaha niama, heta pucioŭka ŭ žyćcio. Kali ty chočaš, kab ciabie viedali, to heta dobry sposab. Kali ty chočaš, kab tvaju muzyku słuchali, «Jeŭrabačańnie» da hetaha nie maje nijakaha dačynieńnia.

Pra prezidenckija vybary

Padčas «pamarančavaj revalucyi» va Ukrainie Śviatasłaŭ Vakarčuk publična padtrymaŭ kandydaturu Viktara Juščanki. Sioleta va Ukrainie čarhovyja prezidenckija vybary. U lidera «Akijana Elzy» pacikavalisia, kaho z kandydataŭ jon padtrymaje na hety raz.

– Rana ci pozna kožny čałaviek, jakomu važny los jaho krainy, pavinien zrabić peŭny vybar. Ale ci pavinien hety vybar być publičnym albo pryvatnym? Ja dumaju, što situacyja ŭ kožnym kankretnym vypadku budzie padkazvać nam heta. Ja nie źbirajusia prapahandavać štości, što budzie nienaturalna dla mianie, što budzie sychodzić nie ad majho serca. I nie źbirajusia padładžvacca pad vybary. Heta maja pazicyja.

• 0
• 0
• 0
• 0
• 0
• 0
• 0
• 0