«Nazvaŭ Usiebiełaruski schod «šabašam». Jak 68-hadovaha byłoha deputata i dyrektara škoły asudzili za «dyskredytacyju Respubliki Biełaruś»
7 červienia sud Navabielickaha rajona Homiela (sudździa Alaksandr Zinčuk) vynies prysud 68-hadovamu Mikałaju Vicikavu ź vioski Cierucha. Za «dyskredytacyju Respubliki Biełaruś» (artykuł 369-1 KK) piensijaniera pakarali 8 miesiacami kałonii. «Radyjo Svaboda» piša pra padrabiaznaści spravy.
Mikałaj Vicikaŭ byŭ zatrymany 14 studzienia 2022 hoda. Tady ŭ Biełarusi prachodzili inicyjavanyja ŭładaj «dyjałohavyja placoŭki» pa abmierkavańni papravak u Kanstytucyju. Piensijanier taksama chacieŭ pryniać udzieł u abmierkavańni. Jon pajšoŭ 5 studzienia da deputata Homielskaha abłasnoha Savieta Ihara Dziahciaryka z prapanovaj arhanizavać u vioscy Cierucha «dyjałohavuju placoŭku». Paśla, u hety ž dzień, jon pajšoŭ da redaktara rajonnaj haziety «Majak» Iryny Kanavałavaj (jana ž — staršynia rajonnaj arhanizacyi «Biełaj Rusi») sa svaimi razvažańniami i bačańniem Kanstytucyi. Redaktar haziety zajaviła na piensijaniera ŭ milicyju.
Tak Vicikaŭ apynuŭsia ŭ SIZA.
Sud byŭ adkrytym. Na im było pradstaŭlenaje chadajnictva žycharoŭ Cieruchi. Jany prasili nie karać piensijaniera stroha, pisali, što jon nikoli nie pryciahvaŭsia da adkaznaści, 12 hadoŭ uznačalvaŭ škołu, aktyŭna zajmaŭsia dobraŭparadkavańniem vioski, byŭ deputatam sielskaha Savieta, dapamahaŭ miascovaj carkvie.
«Dyskredytacyja Respubliki Biełaruś»
Abvinavačvańnie ahučyŭ prakuror Kirył Kadoŭba. Pavodle abvinavačvańnia, Vicikaŭ naŭmysna, «z metaj raspaŭsiudžvańnia dyskredytujučych Respubliku Biełaruś i jaje orhanaŭ ułady zaviedama niepraŭdzivych źviestak, nakiravanych na pryčynieńnie škody dziaržaŭnym i nacyjanalnym intaresam», pradstaviŭ deputatu i redaktaru haziety «niepraŭdzivyja źviestki pra palityčnaje i sacyjalnaje žyćcio».
Havorka idzie pra asabistyja razvahi piensijaniera z nahody źmien u Kanstytucyju i padziej paśla vybaraŭ 2020 hoda ŭ Biełarusi. Razvahi byli zapisanyja na arkušy papiery, ź jakim Vicikaŭ chadziŭ da deputata i redaktara haziety.
Pavodle abvinavačvańnia, piensijanier chacieŭ «raspaŭsiudzić niepraŭdzivyja źviestki šyrokamu kołu asob». Sam ža Vicikaŭ kazaŭ na sudzie, što nie źbiraŭsia raspaŭsiudžvać svaje razvahi — chacieŭ tolki padzialicca imi z deputatam i redaktaram.
«Ja sustrakaŭsia z deputatam Abłasnoha savieta, bo chacieŭ, kab u našaj vioscy prajšła dyjałohavaja placoŭka, bo źmieny ŭ Kanstytucyju — heta losavyznačalnaja padzieja, i ja chacieŭ by, kab ułada raiłasia ź ludźmi», — tłumačyŭ na sudzie Vicikaŭ.
«Praŭdzivaja infarmacyja» ad SK
U svaich razvahach jon zakranaŭ temu hvałtu z boku milicyi paśla 9 žniŭnia 2020 hoda.
«Vy viedali praŭdzivuju infarmacyju — SK i milicyja vykazvalisia, što hvałt nie prymianiaŭsia da pratestoŭcaŭ. Čamu vy pisali ŭ liście, što byŭ hvałt? Adkul vy heta ŭziali?» — pytaŭsia prakuror.
«Ja bačyŭ asabista repartaž pa dziaržaŭnym telebačańni. Tam pakazvali, što troje ci čaćviora milicyjantaŭ bili dubinkami čałavieka, jaki lažaŭ na ziamli. Mianie heta aburyła», — adkazaŭ Vicikaŭ.
«Ale heta byŭ nie hvałt, heta było siłavoje zatrymańnie, i jano dazvolenaje zakonam», — papraviŭ jaho prakuror.
Na sudzie da Vicikava ŭźnikli pytańni i z nahody taho, što ŭ liście jon napisaŭ pra falsifikacyi vybaraŭ. Prakuror śćviardžaŭ, što falsifikacyj na vybarach nie było. «Ja nie skažu za ŭsiu krainu. Ja prasiŭ na svaim učastku ŭ vioscy aznajomić mianie z vynikovym pratakołam vybaraŭ. Hetaha zroblena nie było i pa siońniašni čas», — adkazaŭ piensijanier.
«Błasłaŭlać hanicielaŭ»
U apošnim słovie Vicikaŭ kazaŭ, što ŭ turmie pačaŭ bolš čytać Bibliju, i jamu šmat čaho adkryłasia. Jon cytavaŭ uryŭki ź Jevanhiella, dzie havorycca pra toje, što treba błasłaŭlać hanicielaŭ i malicca za tych, chto ciabie kryŭdzić, lubić ludziej, u tym liku i vorahaŭ. Jon zaznačyŭ, što z punktu hledžańnia chryścijanskich pavodzin jon vinavaty, bo dazvalaŭ sabie asudžeńnie milicyjantaŭ i ŭłady.
Z ulikam taho, što adzin dzień pazbaŭleńnia voli ličycca za paŭtara dnia ŭ SIZA, Vicikavu zastałosia adbyć 2 tydni pakarańnia.
68-hadovamu piensijanieru z Homielščyny dali vosiem miesiacaŭ kałonii za krytyku papravak u Kanstytucyju
Papularny tyktokier z Rasii tusić u darahich restaranach Minska: «Byccam bamžu padali. Žarycie, na zdaroŭje»29
Kamientary