Hajdukievič pieraličyŭ hiej-kłuby Vilni. Paśla ŭdakładniŭ: Litva pamiraje, a ja zvyšnaturał!
U apošnim intervju deputat Aleh Hajdukievič vykazaŭsia: «Nu jakaja Prybałtyka Jeŭropa? Ja Vilniu abjechaŭ usiu. Try hiej-kłuby i «Akropalis» z carkvoj». Adkul spadar Hajdukievič viedaje vilenskija hiej-kłuby, pacikaviłasia «Naša Niva».
«Heta ž humar, treba humar razumieć. Heta vobrazna, — patłumačyŭ łukašenkaŭski deputat. — Mieŭ na ŭvazie, što ŭ Litvie, u Kłajpiedzie, dzie ja vyras, ničoha nie pabudavali novaha. Jany kažuć: nienavidzim savieckuju spadčynu! A ničoha ž niama, akramia taho, što pabudavali padčas SSSR
(heta chłuślivaje śćviardžeńnie. U Kłajpiedzie za časy niezaležnaści źjavilisia novyja partovyja terminały, u tym liku pieršy ŭ rehijonie terminał dla pryjomu zvadkavanaha pryrodnaha hazu, a taksama novyja pradpryjemstvy, žyłyja i ofisnyja budynki, siarod jakich viežy K i D, jakija stali vizualnymi simvałami horada. — NN).
Za miežami centra Vilni staraja savieckaja zabudova, pamiataju jaje z časoŭ dziacinstva. Usio zastałosia, jak było, kropkavyja ŭkrapiny jość, i ŭsio. Niama raźvićcia, na žal, ludzi raźjechalisia.
Miłaja pryhožaja Vilnia — miły horad. Ale raźvićcia niama. Pamiraje, na žal, Litva. Ekanomiku źniščajuć (heta chłuślivaje śćviardžeńnie. Za pieryjad 1994—2022 hadoŭ ekanomika Litvy rasła chutčej, čym biełaruskaja, i na siońnia VUP Litvy na dušu nasielnictva amal u try razy vyšejšy, čym anałahičny pakazčyk u Biełarusi. — NN). Kłajpiedski port zakryli darma (heta chłuślivaje śćviardžeńnie. Kłajpiedski port nie zakryty, a ŭ 2018 — 2021 hadach pastaviŭ histaryčnyja rekordy abjomu pieravałki hruzaŭ. — NN). I ničoha dobraha niama, kali ŭ prezidenta amierykanski pašpart (heta chłuślivaje śćviardžeńnie. U prezidenta Litvy Hitanasa Naŭsiedy niama amierykanskaha pašparta. Jak nie było jaho ŭ nivodnaha ź piaci litoŭskich prezidentaŭ, u tym liku i ŭ Vałdasa Adamkusa, jaki byŭ prezidentam da 2009 hoda. Ën byŭ hramadzianinam Amieryki padčas savieckaj akupacyi Litvy, ale admoviŭsia ad amierykanskaha hramadzianstva, pierš čym bałatavacca ŭ prezidenty. — NN).
A ŭ nas Minsk uvieś zabudavany novaj zabudoŭkaj — voś heta nazyvajecca raźvićcio! Voś što ja mieŭ na ŭvazie!»
Pra hiej-kłuby Hajdukievič dadaŭ:
«Ja zvyšnaturał, staroj farmacyi. Mianie b niedzie na Zachadzie… Ja ž kamplimienty žančynam rablu, a ŭ ich ža tam za kamplimienty ŭ turmu sadžajuć
(heta chłuślivaje śćviardžeńnie. U turmu sadžajuć nie za kamplimienty, a za seksualny hvałt ci prymus da seksu padnačalenych. — NN).
Voś Džoni Dep — niebaraku zasudzili! Dobra chacia b apošni sud vyjhraŭ. Usiu karjeru dziakujučy Džoni Depu zrabiła i za košt jaho choča jašče… Kali jon kiepski čałaviek, navošta hrošaj ad jaho chočaš? Navošta stolki hrošaj jašče tabie płacić? Skažy «dziakuj», što karjeru tabie zrabiŭ i idzi, zajmajsia. A to biednaha mužyka zasudzić chacieli!
Ja, kaniečnie, sačyŭ, uvažliva sačyŭ, bo mnie cikava było čym heta ŭsio skončycca».
Ale chto taki zvyšnaturał?
«Heta znoŭ humar, humar. Značyć, što ja da hiej-kłubaŭ nie mahu mieć anijakaha dačynieńnia. Žančyn ja lublu, razumiejecie? Žančyn.
Mnie ŭvohule hetaja tema nie cikavaja. Chto z hetym zmahajecca vielmi mocna, ja taksama nie razumieju — prablem realnych chapaje! Tamu mianie hetaja tema zusim nie cikavić!
Ja prosta skazaŭ, što dasiahnieńniaŭ nie ŭbačyŭ u architektury — akramia hiej-kłubaŭ i «Akropalisa».
Čamu Cichanoŭskaja nie pajechała na pachavańnie Papy?23
Kamientary