Ukraina zajaviła, što rasijskaje sudna z ukrainskim zbožžam zatrymanaje Turcyjaj
Tureckija mytnyja orhany zatrymali rasijskaje hruzavoje sudna z ukrainskim zbožžam, paviedamiŭ ambasadar Ukrainy ŭ Turcyi, piša Reuters.
Ukraina raniej prasiła Turcyju zatrymać suchahruz «Žybiek žały» pad rasijskim ściaham.
Reparciory ahienctva Reuters bačyli ŭ niadzielu sudna «Žybiek žały», jakoje stajała na jakary prykładna ŭ 1 km ad bieraha i za miežami porta Karasu, bieź vidavočnych prykmiet ruchu.
«U nas jość poŭnaje supracoŭnictva. Sudna ŭ ciapierašni čas staić la ŭvachodu ŭ port, jano zatrymanaje mytnymi orhanami Turcyi», — zajaviŭ ambasadar Vasil Bodnar u efiry ŭkrainskaha nacyjanalnaha telebačańnia.
Bodnar skazaŭ, što los sudna budzie vyrašany na pasiadžeńni ŭ paniadziełak, i što Ukraina spadziavajecca na kanfiskacyju zbožža.
Ukraina abvinavaciła Rasiju ŭ kradziažy zbožža z terytoryj, zachoplenych rasijskimi vojskami z pačatku ŭvarvańnia ŭ kancy lutaha. Kreml raniej admaŭlaŭ, što Rasija skrała ŭkrainskaje zbožža.
Pradstaŭnik Ministerstva zamiežnych spraŭ Ukrainy, spasyłajučysia na infarmacyju marskoj administracyi Ukrainy, paviedamiŭ ahienctvu Reuters u piatnicu, što sudna «Žybiek žoły» pahruziła pieršy hruz z prykładna 4500 ton ukrainskaha zbožža ź Biardziansku, akupavanaha Rasijaj porta na poŭdni Ukrainy.
Kamientaroŭ rehijanalnaha kiravańnia porta Sakarja i Ministerstva zamiežnych spraŭ Turcyi pakul nie hučała.
Ciapier čytajuć
Inžyniera-kanstruktara z upraŭleńnia «Pielenha», jakoje robić techniku dla rasijskaha vojska, asudzili pa palityčnych artykułach4
Kamientary