Śmiešnaja chłuśnia BiełTA: «Turki chočuć vyjści z NATA». Hladzicie, jak heta zroblena
Dziaržaŭnaja prapahanda paviedamlaje pra toje, što ŭ Turcyi prachodzić «maštabnaja kampanija» pa vychadzie krainy z NATA. Tłumačym, jak zbudavanaja hetaja manipulacyja.
«Maštabnaja kampanija «Vyjdziem z NATA», razhornutaja tureckaj partyjaj «Radzima» pa ŭsioj krainie, była padtrymanaja vialikaj kolkaściu hramadzian», — piša BiełTA sa spasyłkaj na tureckuju hazietu Aydınlık (heta hazieta partyi «Radzima»).
«Patrabavańnie pakinuć NATA — heta patrabavańnie tureckaha naroda. 90% tureckaj nacyi ciapier bačać u NATA voraha», — piša BiełTA.
Stop. Pa pieršaje, sama partyja «Radzima» (Vatan Partisi) — hłyboka marhinalnaja palityčnaja siła ŭ Turcyi. Na apošnich parłamienckich vybarach hetaja ultralevaja, prakitajskaja i prarasijskaja partyja nabrała ŭsiaho tolki 0,23%. Partyja nie zdoleła pravieści ŭ parłamient nivodnaha člena.
Adznačym, što hałoŭnyja palityčnyja siły Turcyi (jak kansiervatyŭna-isłamskaja partyja Erdahana, tak i levacentrysckaja Respublikanskaja narodnaja partyja), jak i bolšaść tureckich vybarcaŭ, nie staviać pad pytańnie členstva Turcyi ŭ NATA. Antynataŭskija siły, jakija vystupali b za vychad Turcyi z błoku, — marhinalnyja.
Akramia taho, nie tak daŭno było praviedzienaje apytańnie hramadskaj dumki ŭ Turcyi pra adnosiny z NATA. I jano pakazała, što tolki 27,8% turkaŭ vystupajuć za vychad z arhanizacyi, a absalutnaja bolšaść — za zachavańnie členstva.
Apytańnie pakazała, što bolšaść turkaŭ nie da kanca daviarajuć arhanizacyi, ale vychodzić ź jaje nie chočuć i nie źbirajucca.
Turcyja stała členam NATA ŭ 1952 hodzie. Jana ŭdzielničaje ŭ šmatlikich inicyjatyvach błoku. U Turcyi znachodzicca centralnaje kamandavańnie ŭsich suchaputnych sił NATA, niekalki avijabaz, a taksama supraćrakietny radar. Asnoŭnyja sprečki pamiž Turcyjaj i NATA ŭźnikajuć pa kurdskich i kiprskich pytańniach. Niahledziačy na niaŭstojlivyja adnosiny, Turcyja nie bačyć realnych alternatyŭ členstvu ŭ NATA.
Dziaržprapahanda maluje NATA ŭ niehatyŭnym śviatle, bo hety aljans macniejšy za Rasiju ŭ vajennym płanie i supraćstaić Maskvie.
Chto pavinien być prezidentam Biełarusi ŭ pierachodny pieryjad? Razvažajuć viadomyja biełarusy18
Kamientary