Prakopjeva «paprasili» z Ukrainy? Jon kaža, što «vyjechaŭ nienadoŭha». A połk «Pahonia» ŭžo adpraviŭsia na pieradavuju
Namieśnik kamandzira pałka «Pahonia» Vadzim Prakopjeŭ pakinuŭ terytoryju Ukrainy. Nakont hetaha chodzić šmat čutak, ažno da taho, što jaho «paprasili». Sam palityk kaža, što pajechaŭ atrymlivać «ženieŭski pašpart», bo biełaruski skončyŭsia. Častka bajcoŭ jaho «Pahoni» pry hetym užo ŭčora adpraviłasia na pieradavuju ŭ składzie bryhady asobnaha pryznačeńnia imia Ivana Bahuna.
Učora Prakopjeŭ vystupiŭ na forumie ŭ Bierlinie, prajšoŭsia pa daradcy Śviatłany Cichanoŭskaj Franaku Viačorku, a taksama prapanavaŭ palityčnuju schiemu, pry jakoj Cichanoŭskaja stanovicca «brytanskaj karalevaj», a pry joj uźnikaje alternatyŭny ŭrad z premjer-ministram, čyju kandydaturu hatovy prapanavać Prakopjeŭ.
U zadačy hetaha ŭrada maje ŭvachodzić i abaviazak padrychtoŭki siłavoha błoku, čym ofis Cichanoŭskaj nie zajmajecca.
Pry abmierkavańni ekspresiŭnaha śpiču palityka ŭ čatach pačali źjaŭlacca paviedamleńni, što samoha Prakopjeva «paprasili z Ukrainy». Ci tak heta? U kamientaryi «Našaj Nivie» Prakopjeŭ paćviardžaje, što z Ukrainy vyjechaŭ, ale nazyvaje pryčynu.
«U mianie skončyŭsia pašpart, ja pajechaŭ atrymlivać «ženieŭski», pra jaki damoŭlena. Heta zojmie paru tydniaŭ, i pajedu nazad», — kaža Prakopjeŭ.
Taksama jon raskazaŭ paru słovaŭ pra los pałka «Pahonia», kaściak jakoha składajuć byłyja bajcy biełaruskich siłaŭ śpiecyjalnych apieracyj.
«Naša aeravyviedka trenirujecca ŭ Čechii, kontrvyviedka — u Polščy i va Ukrainie. Bajcy, vychadcy z SSA, litaralna ŭčora adpravilisia na pieradavuju ŭ składzie asobnaj bryhady śpiecyjalnaha pryznačeńnia imia Ivana Bahuna. Tam ža i vajskovyja miedyki», — skazaŭ Prakopjeŭ.
Jon taksama zajaviŭ, što źjavicca na forumie 9 žniŭnia, jaki budzie pravodzicca ofisam Cichanoŭskaj da ŭhodkaŭ vybaraŭ. Na im budzie abmiarkoŭvacca, što rabić dalej.
Kamientary