«Chodziać prosta pa kvaterach». Mikałajeŭ zakryli, abjavili kamiendanckuju hadzinu — šukajuć kałabarantaŭ
Z metaj vyjaŭleńnia dyviersantaŭ i navodčykaŭ u Mikałajevie ŭviedziena praciahłaja kamiendanckaja hadzina z 23:00 5 žniŭnia da 5:00 8 žniŭnia, piša «UNIAN».
Staršynia Mikałajeŭskaj abłasnoj rady Hanna Zamaziejeva ŭ efiry infarmacyjnaha telemarafonu raspaviała, jak idzie ŭviedzienaja miascovymi ŭładami padoŭžanaja kamiendanckaja hadzina ŭ horadzie.
«Kałabaranty i sieparatysty jość, skazać što ich šmat, my nie možam, ale sprava dzielicca na try etapy. Pieršaje — znajści ich, potym asudzić i nie dazvalać im vychodzić pad zakład, tamu što naš narod hatovy ździejśnić samasud nad imi. Usie, chto paciarpieŭ, ich susiedzi, blizkija i svajaki, čyje žyłyja damy paškodžany, čyjo mirnaje žyćcio razburana, jany svaju złość pieranosiać na kałabaracyjanistaŭ. Heta značyć vypuścić ich pad zakład — heta pahražaje navat ich (kałabarantaŭ — Red.) žyćciu. Ličym, što lepš za ŭsio im zastavacca ŭ turmie da našaj pieramohi, ci adpraŭlać ich tudy, na kaho jany pracujuć», — skazała Zamaziejeva.
Staršynia Mikałajeŭskaha abłsavieta adznačyła, što praviadzieńnie apieracyi pa vyjaŭleńniu rasijskich dyviersantaŭ i kałabarantaŭ jašče praciahvajecca, tamu ab kančatkovych vynikach budzie paviedamlena ŭ paniadziełak, kali pravaachoŭnyja orhany daduć dazvoł na raspaŭsiudžvańnie hetaj infarmacyi.
«Vynikaŭ my pakul nie damo, bo nie možam raskryvać infarmacyju, pakul doŭžycca kamiendanckaja hadzina na praciahu 2 sutak. Zaraz prachodziać pravierku ŭsie žychary Mikałajeva. Vyjezd dazvalajecca tym, u kaho byli nabyty zahadzia kvitki, heta značyć pry najaŭnaści kvitka i dakumientaŭ možna pakinuć horad», — rastłumačyła Zamaziejeva.
Staršynia Mikałajeŭskaha abłsavieta adznačyła, što žychary, jakija zastalisia ŭ Mikałajevie, zahadzia nazapasilisia praduktami, vadoj i tavarami pieršaj nieabchodnaści.
«Nasielnictva padzialiłasia na dźvie častki — jość tyja, jakija vyjechali za miežy vobłaści, i jany ŭčora prachodzili pravierki na błokpastach. Tyja, chto zastaŭsia, prachodziać pravierku zaraz. Ludzi narmalna da hetaha staviacca, tamu što razumiejuć — heta pytańnie dalejšaj biaśpieki ŭsiaho horada», — skazała Zamaziejeva.
Jana dadała, što pravierka žycharoŭ adpaviednymi orhanami adbyvajecca pa ŭsich žyłych damach i kvaterach.
«Chodziać prosta pa kvaterach — praviarajuć kožnuju, hladziać dakumienty i mabilnyja telefony — praviarajuć usio», — dadała Zamaziejeva.
Staršynia Mikałajeŭskaha abłsavieta adznačyła, što rasijskaj prapahandzie nie ŭdajecca padarvać duch miascovaha nasielnictva raspaŭsiudžvańniem fejkavaj infarmacyi ab tym, što akupanty nieŭzabavie mohuć zachapić Mikałajeŭ.
«Tak, hetuju temu ludzi abmiarkoŭvajuć na kožnaj vulicy i ŭ kožnym domie, ale heta nie padryvaje duch nasielnictva. Hetyja fejki nie prymušajuć ludziej pakidać horad. Usie hatovy i dalej pracavać na pieramohu, nichto masava horad nie pakidaje», — padkreśliła Zamaziejeva.
Jak paviedamlaŭ UNIAN, 20 lipienia staršynia Mikałajeŭskaj AVA paviedamiŭ, što dla praviadzieńnia apieracyi pa vyjaŭleńni navodčykaŭ akupantaŭ płanujecca za tydzień-dva zakryć Mikałajeŭ na niekalki dzion.
Kamientary