Ad elektrakaraŭ da mikraaŭtobusaŭ. Jakija «ajčynnyja» aŭtamabili ŭžo vypuskali ŭ Biełarusi
Učora Łukašenka naviedaŭ u Minsku zavod «Motavieła», dzie raskrytykavaŭ pracu pradpryjemstva i jaho kiraŭnictva za pravalenyja daručeńni pa łakalizacyi vytvorčaści. Na zavodzie palityku pakazali «biełaruski» matacykł. Jak vyśvietliłasia, pad vyhladam ajčynnaha byŭ francuzski Mash X-Ride, jaki źbirajecca ŭ Kitai. «Naša Niva» pahladzieła, jakuju inšuju techniku ŭłady vydavali za «biełaruskuju».
Paŭdniovaafrykanski biełarus
Dla minskaha motaviełazavoda heta ŭžo druhi fejł, u jaki jany traplajuć tolki ciaham hetaha leta. U červieni pradpryjemstva vypuściła elektrakar, dakładniej, elektryčny kvadrycykł. Tady pad vyhladam «biełaruskaha» publicy prezientavali elektryčny aŭtamabil kitajska-afrykanskaha pachodžańnia Eleksa CityBug.
Ekzemplar, jaki padavali jak «biełaruski», adroźnivaŭsia ad aryhinała tolki rašotkaj pamiž farami, dzie byŭ raźmieščany łahatyp M1NSK. Pry hetym, na styrnie i kapocie elektrakara, vyrablenaha na Motaviełazavodzie, praciahvaŭ krasavacca łahatyp paŭdniovaafrykanskaha brenda.
Usie hetyja niedarečnaści adbyvajucca na fonie pieryjadyčnych zajaŭ pra toje, što Biełaruś chutka vypuścić ułasny elektramabil. Hetaj idejaj zaharelisia paśla taho jak u 2017-m Łukašenka pratestavaŭ Tesla. Tady jon daručyŭ ajčynnym raspracoŭščykam imknucca da hetaha ŭzroŭniu.
U 2018 hodzie staršynia Prezidyuma Nacyjanalnaj akademii navuk Uładzimir Husakoŭ abiacaŭ žurnalistam prademanstravać takuju raspracoŭku da kanca 2018-ha. Ale treba razumieć, što hetak zvany biełaruski aŭtamabil u lubym vypadku vielmi ŭmoŭna možna było nazyvać biełaruskim, pakolki rabili jaho nie z nula, a ŭžo ź isnujučaha kitajskaha Geely.
Tym nie mienš, staršynia Prezidyuma NAN čatyry hady tamu raspaviadaŭ mienavita pra raspracoŭku ŭłasnaha elektrakara:
«Zaraz aktyŭna pracujem užo nad całkam biełaruskim uzoram elektramabila. Heta vielmi składany miechanizm dla vyrabu, adpracoŭvajem roznyja sistemy. My płanujem stvareńnie elektramabila nie tolki niejkaha adnaho typu — ale i pradstaŭničaha kłasa, i siaredniaha kłasa, i dastupny dla šyrokich słajoŭ nasielnictva», — adznačaŭ jon.
Praz dva z pałovaj hoda, u studzieni 2021-ha, jon znoŭ zajaŭlaŭ pra hatoŭnaść Biełarusi vypuskać poŭnaściu svoj elektramabil. Ale, jak bačym, svajoj «Tesły» ŭ nas tak i nie źjaviłasia.
Akademija navuk paźniej pradstaviła tolki elektryčny pikap ułasnaj zborki.
Hałoŭnaje — zamianić šyldu
Nazyvać kitajskuju techniku «biełaruskaj» stała ŭžo niečym zvyčajnym. Niešta padobnaje možna nazirać i ŭ vypadku ź mikraaŭtobusami MAZ, jakija źbirajuć na Bresckim mašynabudaŭničym zavodzie. Ź biełaruskaha tam tolki zborka i šylda. Mikraaŭtobusy prosta źbirajuć z mašynakamplektaŭ kitajskaha vytvorcy JAC.
Ci moža Biełaruś vypuskać ułasnyja aŭto?
Adnak, niahledziačy na ŭsie papiarednija niaŭdačy, Łukašenka nie hublaje nadziei zrabić svoj aŭtamabil. Dniami ŭ efiry STB ministr pramysłovaści Piotr Parchomčyk zajaviŭ, što jość daručeńni Łukašenki stvaryć całkam biełaruski aŭtamabil. Hetaja zajava stała reakcyjaj na toje, što praz sankcyi zavod BiełDŽY za 2022 hod vypuścić u try razy mienš mašyn, čym u 2021 hodzie.
Składanaści z vypuskam Geely ŭ Biełarusi źviazany z tym, što praz sankcyi jeŭrapiejskija vytvorcy prypynili pastaŭki kamplektujučych u Biełaruś. Takija naviny śviedčać pra toje, što navat u kitajskich aŭtamabilach jość peŭnaja dola jeŭrapiejskaha impartu, bieź jakoho niemahčyma vypuskać mašyny.
Adnak kali hladzieć na rečy ćviaroza, u Biełarusi niama šancaŭ raspracavać i zapuścić u sieryju aŭtamabil ułasnaj marki. Dziela spraviadlivaści adznačym, što naša kraina daloka nie adzinaja ŭ śviecie, chto nie moža sabie heta dazvolić.
Bolš za toje, za apošnija dziesiacihodździ my bačyli šmat prykładaŭ, kali nievialikija miascovyja brendy sychodzili z rynku abo ŭvachodzili ŭ skład vialikich kancernaŭ, bo nie vytrymlivali kankurencyju. Ź jaskravych prykładaŭ — češskaja Skoda i ispanski SEAT, jakija stali častkaj kancerna VAG.
Adnak usie hetyja pracesy nie pieraškadžajuć tamu, što ŭ roznych krainach, jakija raźvivajucca, źjaŭlajucca zavody, dzie vialikija aŭtakancerny z tym ci inšym uzroŭniem łakalizacyi vyrablajuć aŭtamabili pad ułasnymi markami. Šmat takich prykładaŭ my mahli nazirać u tym liku ŭ Rasii, dzie da vajny pracavali zavody takich hihantaŭ, jak Renault, BMW, VW i inšyja.
Navat Łada bolš, čym na 50% zroblena ź impartnych kampanientaŭ
I navat kali brać da ŭvahi aŭtamabili rasijskaj marki LADA, to i jana, jak vyśvietliłasia, z bolšaha vyrablałasia z zamiežnych kampanientaŭ. Navat LADA Niva, jakuju pačali vypuskać jašče ŭ časy SSSR, bolš, čym na 50 adsotkaŭ składałasia z zamiežnych składnikaŭ. Mienavita z-za hetaha atrymałasia, što paśla ŭviadzieńnia sankcyj u Rasii amal spyniłasia vytvorčaść nie tolki aŭto zamiežnych marak, ale i miascovaj.
Kab choć niejkim čynam praciahvać źbirać mašyny, rasijanie byli vymušanyja prymać źmieny ŭ zakanadaŭstvie, dazvalać rehistravać aŭto, jakija adkazvajuć ekałahičnamu kłasu jeŭra-2. Taksama jany byli vymušanyja pačać vypuskać mašyny bieź jakich-niebudź dadatkovych opcyj u vyhladzie ABS, padušak biaśpieki i h.d.
Tamu kali ŭłady ŭ čarhovy raz buduć razmaŭlać pra vypusk aŭłasnych aŭto, možna čakać, što ŭ lepšym vypadku jany znoŭ pakažuć kitajskuju raspracoŭku pad vyhladam «biełaruskaj», jak heta było ŭ vypadku z matacykłam M1NSK.
Kamientary