Ci isnuje «Nacyjanalnaja respublikanskaja armija», jakaja nibyta zabiła Darju Duhinu?
Učora ŭviečary eks-deputat Dziarždumy RF, a ciapier kijeviec Illa Panamaroŭ raspavioŭ na svaim kanale «Utro fievrala», što zabojstva Duhinaj — sprava ruk padpolnaj rasijskaj arhanizacyi. Julija Łatynina ŭ «Novaja hazieta. Jevropa» razvažaje, chto staić za «Nacyjanalnaj respublikanskaj armijaj».
Na svaim kanale apazicyjanier Illa Panamaroŭ raspavioŭ, što niekalki miesiacaŭ tamu jon zavioŭ telehram-bot dla suviazi z unutryrasijskim supracivam, i jamu ŭ hety boi napisała niejkaja «Nacyjanalnaja respublikanskaja armija» (NRA), jakaja pad bieła-sinie-biełym ściaham budzie zabivać pucinskich čynoŭnikaŭ, i Panamaroŭ ź imi pierapisvaŭsia. Jany nibyta ŭžo ažyćciaŭlali akcyi «pramoha dziejańnia», eks-deputat navat kahości vyviez z Rasii, a niekalki čałaviek było zabita (!) u Vałhahradskaj vobłaści. I voś jany jamu napisali, što zabjuć Duhina i jaho dačku («jany nam kazali, što heta buduć Darja i Alaksandr Duhiny»), i «vykanali abiacańnie». I ŭ mašynie było dvoje čałaviek — a čyju śmierć zamiest Duhina chavajuć, jon, Panamaroŭ, ujavić nie moža.
«Zapeŭnivaju vas, nijakaj «Nacyjanalnaj respublikanskaj armii» nie isnuje — hetak ža, jak nie isnuje i słužby biaśpieki Aščadbanka ŭ papraŭčaj kałonii №1», — piša Łatynina.
Jana miarkuje, što ŭ hetym vypadku havorka idzie pra hulniu śpiecsłužbaŭ. Jana źviartaje ŭvahu na słovy Panamarova ab papiarednich «akcyjach pramoha dziejańnia» kštałtu padpałaŭ vajenkamataŭ, jakija ažyćciaŭlalisia na terytoryi Rasii i za jakija taksama biare na siabie adkaznaść «NRA».
«Mnie składana ŭjavić, da prykładu, što Illa Panamaroŭ niekalki miesiacaŭ razmaŭlaŭ z hetymi chłopcami i nie paviedamiŭ pra heta ŭ SBU. Mnie taksama ciažka ŭjavić sabie, kab možna było niešta padpalvać na terytoryi Rasii niekalki miesiacaŭ biez taho, kab być infiltravanym ahientam śpiecsłužbaŭ», — razvažaje jana.
«Tak ci inakš, ja miarkuju: zabojstva Duhinaj — heta zaviaršalnaja častka novaj apieracyi «Trest» (kontrvyviednickaja apieracyja savieckich śpiecsłužbaŭ u 1920-ja hady, nakiravanaja na vyjaŭleńnie praciŭnikaŭ režymu ŭnutry SSSR praz stvareńnie falšyvaj arhanizacyi antybalšavickaha padpolla. — Red.).
«Hałoŭnaja meta hetaj apieracyi składajecca ŭ tym, kab znajści na miescy vybuchu vizitoŭki Navalnaha, Chadarkoŭskaha i Kasparava. A vizitoŭku Panamarova i znachodzić nie treba — jon sam z honaram abviaściŭ, što jana tam jość», — piša jana.
Na jaje dumku, nastupny chod — zaklikać da tatalnaha teroru suprać «bieła-sinie-biełaha ściaha» i «apazicyjanieraŭ-terarystaŭ», simvałam jakich jon zjaŭlajecca.
Łatynina piša, što eks-deputat Dziarždumy Illa Panamaroŭ zjechaŭ z Rasii na fonie kanfliktu pamiž Surkovym i Vałodzinym, u vyniku jakoha na jaho była zaviedzienaja kryminalnaja sprava ab vypłacie jamu Surkovym 300 tysiač dalaraŭ za čytańnie niejkich lekcyj u «Skołkavie».
«Panamaroŭ žyvie va Ukrainie, z pačatkam vajny jon pajšoŭ u terabaronu, ale vajennaja karjera apynułasia karotkaj, a zamiest jaje eks-deputat zavioŭ vielmi darahi (sa studyjami, abstalavańniem, viadučymi) kanał, na jakim siaredniaja hłybinia prahladu videa — 2—6 tysiač. Taki čałaviek ź jaho ambicyjami — idealny abjekt dla manipulacyj śpiecsłužbaŭ», — miarkuje jana.
Na scenu vyjšła rasijskaja «Nacyjanalnaja respublikanskaja armija», jakaja ŭziała na siabie adkaznaść za zabojstva Duhinaj
Łatuška: Ryžankoŭ maryć stać prezidentam Biełarusi i nienavidzić Łukašenku. Jon nie projdzie detektar chłuśni6
Kamientary
P.S. v rosii davniaja "bombistskaja" tradicija, a Aleksandra 2 vzorvał biełorus ;)