Čały patłumačyŭ, jakim čynam rassyplecca Usiebiełaruski narodny schod
U prahramie «Naviny z Čałym» na kanale «Biełaruskaha rasśledavalnickaha centra» analityk Siarhiej Čały razabraŭ apošnija zajavy Alaksandra Łukašenki adnosna roli Usiebiełaruskaha narodnaha schodu.
Siarhiej Čały ŭ novym vypusku prahramy siarod inšych tem zakranuŭ i abvieščanaje žadańnie Łukašenki pravodzić vybary biez udziełu hramadstva. Alaksandr Łukašenka 30 žniŭnia vykazaŭ škadavańnie, što pry pryniaćci abnoŭlenaj Kanstytucyi nie praduhledzieli vybary orhanaŭ ułady, «i asabliva prezidenta», praz Usiebiełaruski narodny schod.
«My darma nie ryzyknuli prapanavać ludziam abirać orhany ŭłady, asabliva prezidenta, na UNS. Darma. Vybary prezidenta buduć razhojdvać situacyju. <…> Usio ž taki palityka, partyjnaja dziejnaść i inšaje — heta taksama prafiesijnaja praca. Što ŭ nas siem ź lišnim miljonaŭ (kolki ŭ nas tam vybarščykaŭ?) — jany što, tak pahružanyja va ŭsie hetyja pracesy, kab śviadoma vyznačacca?» — skazaŭ Łukašenka.
«Padobna, što šok ad vybaraŭ 2020 hoda byŭ nastolki mocny, što navat niahledziačy na toje, što, pa słovach Łukašenki, za jaho prahałasavali 6 500 000 vybarščykaŭ z, na chvilinku, 5 800 000, jakija, pa aficyjnych danych, pryjšli na vybary, što Łukašenka, padobna, vyrašyŭ, što daviarać takuju spravu jak vybary prezidenta zvyčajnym vybarščykam, nielha», — iranizuje Čały.
«Heta značyć, sistema takaja: prafiesijnuju ŭładu pavinny abirać prafiesijnyja vybarščyki, tyja samyja «usiebiełarusy» — prezidencki narod. A hetyja prafiesijnyja vybarščyki — u tym liku, i sama ŭłada», — tłumačyć analityk.
Jon zadajecca pytańniem, navošta patrebnaja takaja hruvastkaja sistema, kali «ty abiraješ vybarščykaŭ, jakija ciabie ž i abirajuć?» Značna ž praściej abjavić siabie pažyćciovym prezidentam.
«A voś jakraz u tym i hałoŭnaje pytańnie — što budzie paśla «pažyćciovaści»?» — tłumačyć Čały prablemu.
Tamu, pavodle jaho, «tak, uvohule, nie novaj idei cyrkularnych samapryznačeńniaŭ, zamaskavanych pad vybary, dadajecca novaja ideja tak zvanaha kursu Usiebiełaruskaha narodnaha schodu».
«Usiebiełaruski narodny schod vyznačyć kontury našaj budučyni, vyznačyć tuju kalainu, pa jakoj budzie ruchacca dziaržava. Prysutničać buduć usie, i budźcie łaskavyja, hety kurs, jaki budzie tam vyznačany, budźcie łaskavyja ŭsie prytrymlivacca hetaha kursu. Syšli naleva-naprava — partyja ci hramadski ruch pavinny być likvidavanyja», — raspaviadaŭ pra svaju ideju Łukašenka.
To-bok va Usiebiełaruski narodny schod pavinny ŭvachodzić tolki tyja, chto prytrymlivajecca kursu Usiebiełaruskaha narodnaha schodu, jaki jon ža sam i pavinien vyznačyć. «Tak, pa idei, pavinna harantavacca absalutnaja niaźmiennaść palityki, niahledziačy na źmianialnaść ułady», — tłumačyć łukašenkaŭskuju zadumu Čały.
«Sistema absalutnaj ułady, jakaja vybudoŭvajecca, — heta navat nie sučasnaja dyktatura abo tatalitaryzm, heta navat nie poźni absalutyzm, i heta navat nie kniaskaja viečavaja sistema, ź jakoj prapahandysty paraŭnoŭvajuć kanstrukcyju UNS.
Heta jašče bolš staražytnaja archaičnaja sistema kiravańnia, sapraŭdnaja teakratyja, dzie ŭłada naležyć žracam — zachavalnikam Śviatoha Kursu, dzie adchileńnie ad hetaha kursu aznačaje likvidacyju (pakul tolki partyj i hramadskich abjadnańniaŭ, nu a potym užo łahična zapatrabuje paŭnavartasnaj inkvizicyi).
U paraŭnańni z hetaj sistemaj navat spadčynnaja manarchija źjaŭlajecca ŭzoram hnutkaści. Spadčyńnik pa naradžeńni nie abaviazany prytrymlivacca kursu papiarednika. Mienavita z hetaj pryčyny ŭ historyi čałaviectva niama kolki-niebudź praciahłych i ŭstojlivych teakratyj. Lubaja sistema pavinna mieć mahčymaść źmianiacca, reahujučy na źmieny źniešnich umoŭ. Sistema vybaraŭ naohuł i była prydumanaja dla ŭniasieńnia voś hetaj niavyznačanaści, pačynajučy z samaha staražytnaha mietadu vybaraŭ — vybaraŭ pa žerabi, jak, naprykład, u Staražytnaj Hrecyi», — kaža Čały.
Na jaho dumku, heta žachlivaje nahruvaščvańnie archaičnych kanstrukcyj źjaŭlajecca śledstvam usiaho tolki žadańnia adnaho čałavieka pravić nie tolki pažyćciova, ale i paśla śmierci.
«Adziny śvietły momant u hetym usim toje, što hetaja sistema harantavana niežyćciazdolnaja. Palityčnuju baraćbu niemahčyma likvidavać z čałaviečaha žyćcia: vyhnali ŭ dźviery — jana vierniecca ŭ akno — baraćboj za samaje pravilnaje tłumačeńnie adzina pravilnaha kursu», — pradkazvaje Čały.
Łukašenka škaduje, što na refierendum nie vysunuli ideju abrańnia prezidenta praz «Usiebiełaruski narodny schod», bo vybary «razhojdvajuć situacyju»
«Kaniec epochi imitacyi». Cyhankoŭ — pra vierahodnuju admienu vybaraŭ
«Prafiesijny kazačnik». Cyhankoŭ uspomniŭ prahnozy Šaŭcova i Mieljancova
-
HUBAZiK pierastaŭ vykładać videa z zatrymanymi. Z dnia, kali da hetaha zaklikaŭ kanał, blizki da Markava
-
Kali Ukraina zachavaje suvierenitet uzamien za niejtralnaść, što heta budzie značyć dla Biełarusi?
-
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?
Kolki nasamreč ciahnucca pracoŭnyja pajezdki Łukašenki? Cikavyja ličby12
Kamientary