Čamu katy trucca ab vas, a sabaki namahajucca ablizać tvar: zaołahi raskazvajuć pra dzivactvy chatnich žyvioł

Chatnija žyvioły časam robiać dziŭnyja rečy. Prynamsi, tak moža zdacca ludziam. Ale hetyja rysy časta majuć sens dla žyvioł, kažuć navukoŭcy.

Vaš sabaka nie całuje vas, a manipuluje

U toj čas jak sabaki majuć šmat zvyčak, uspadkavanych ad vaŭkoŭ, jany taksama vypracavali niekalki ŭłasnych sučasnych pryjomaŭ, naprykład, «vočy ščaniuka» — niavinny pozirk, pierad jakim nielha ŭstajać. U sabak raźvilisia peŭnyja myšcy vakoł vačej, kab manipulavać ludźmi — i jany paśpiachova hetym karystajucca.

Jak i vaŭki, sabaki taksama lubiać lizać tvary. Ludzi dumajuć, što hadavaniec ich całuje, ale ž heta nie tak. Hetak ščaniuki-vaŭki atrymlivajuć ježu z rota svaich baćkoŭ. Taksama heta moža być znakam padparadkavańnia. Kali asobina nižejšaha ranhu nabližajecca da asobiny vyšejšaha ranhu, jana apuskajecca vielmi nizka i ablizvaje daminujučaha, kab prademanstravać, što nie źjaŭlajecca pahrozaj.

Sabaki mohuć vučycca ŭ ludziej, hetak ža, jak dzieci vučacca ŭ darosłych — i nasamreč sabaki vučacca navat lepš, čym dzieci. Kali vy pakazvajecie dzieciam, jak štości rabić, i pakazvajecie pry hetym niepatrebnyja kroki — dzieci buduć kapijavać ich poŭnaściu. Ale jak tolki sabaki razumiejuć, jak štości zrabić, jany bolš nie robiać niepatrebnych krokaŭ, bo chutčej razumiejuć kančatkovuju metu hulni.

Niahledziačy na ​​heta, ich staražytnyja instynkty zachoŭvajucca. Sabaki, naprykład, časta «zaściłajuć sabie łožak», kružačysia pa koŭdrach ci sabačych łožkach, pierš čym uładkavacca. Hetaja zvyčka, vierahodna, pachodzić ad spradviečnaha instynktu stvarać biaśpiečnaje, ciopłaje miesca dla snu.

Jany taksama časam kružacca, pierš čym sparažnicca, što niekatoryja daśledčyki tłumačać sprobaj vyraŭniacca z mahnitnym polem Ziamli, u pryvatnaści z vośsiu poŭnač-poŭdzień. Ale tut mierkavańni razychodziacca i nie kožny navukoviec u hetym pierakanany.

Časam paśla sparažnieńnia sabaki zahrabajuć łapaj ziamlu. Jany nie zakopvajuć svaje fiekalii, a namahajucca pakinuć svoj pach. A drapańnie ziamli robić dadzienaje miesca zaŭvažnym.

Taki pakazalnik pryznačany dla inšych sabak — heta adna z asablivaściaŭ, jakuju jany atrymali ŭ spadčynu ad vaŭkoŭ. Ale vykazvajucca zdahadki, što ŭ pachach moža być zakadavana šmat inšaj infarmacyi ab takich rečach, jak, naprykład, repraduktyŭny stan ci stan zdaroŭja.

Jość niekatoryja pavodziny, jakija daśledčyki nie mohuć rastłumačyć. Naprykład, «zumi» — termin, jaki časta vykarystoŭvajecca dla apisańnia šalonych i, zdavałasia b, vypadkovych ruchaŭ sabaki, vykid enierhii, kali hadavaniec biehaje varjackimi manijakalnymi kołami z raziaŭlenaj paščaj, vysunutym jazykom i vušami nazad. Sabaki robiać heta, kali uzbudžanyja abo ščaślivyja.

Pavialičyć

Čamu vaš kot «tykajecca» ŭ vas

Kotki, u adroźnieńnie ad sabak, amal zaŭsiody zakopvajuć svaje sparažnieńni. Jany namahajucca zamieści ślady svajho znachodžańnia ŭ kankretnym miescy.

Šmat prajavaŭ kacinych pavodzinaŭ taksama pachodzić ź ich dzikaha minułaha. Jany vielmi drapiežnyja žyvioły, jakija najbolš aktyŭnyja na dośvitku i ŭ pryciemkach, ale znachodziacca ŭ siaredzinie charčovaha łancuha — adnačasova i palaŭničyja, i abjekt palavańnia.

Ekśpierty taksama nastojvajuć na tym, što reputacyja košak jak sacyjalna addalenych istot, — niezasłužanaja.

U katoŭ jość pachkija załozy na tvary, i kali jany trucca hałavoj ab čałavieka, jany, vierahodna, pakidajuć sakret, kab paznačyć svaich sacyjalnych partnioraŭ.

«Raźminańnie» — heta toje, što kacianiaty robiać sa svajoj maci padčas karmleńnia, kab stymulavać vypracoŭku małaka. Darosłyja katy mohuć «tykacca» ŭ čałavieka, kali toj adčuvaje siabie rassłablena abo sprabuje supakoicca. Heta padobna da smaktańnia vialikaha palca ŭ dziaciej, kažuć vieterynary.

Pavialičyć

• 119
• 0
• 17
• 4
• 12
• 6
• 15
• 0