Namieśnik kamandzira pałka Kalinoŭskaha: U nas jość palityčnyja ambicyi, a Sachaščyku my nie daviarajem

Pa vynikach sustrečy ź Mižfrakcyjnym deputackim ab‘iadnańniem «Demakratyčnaja Biełaruś» ukrainskija deputaty vyrašyli zaprapanavać uradu ŭnieści źmieny ŭ pastanovu, jakaja nie dazvalaje vypłačvać kampiensacyi siemjam zahinułych za Ukrainu biełaruskich hramadzian. Taksama deputaty vyrašyli vynieści na hałasavańnie pastanovu ab pryznańni Biełarusi časova akupavanaj Rasijaj terytoryjaj.

— Vadzim, raskažycie, što heta była za sustreča, jakoj była jaje zadača?

— Heta była sustreča z deputatami Viarchoŭnaj rady, jakija ŭvachodziać u hrupu padtrymki Biełarusi. My ŭžo daŭno płanavali naładžvańnie takich palityčnych kantaktaŭ. Pieršyja miesiacy vajny my zajmalisia faktyčna vajskovym budaŭnictvam, ale zaraz my razumiejem, što dla taho, kab paśpiachova realizavać płany pa źmienie ŭłady ŭ Biełarusi, nam patrebnyja ŭ tym liku i palityčnyja kantakty, zychodziačy z roznych mierkavańniaŭ. U pieršuju čarhu, kab my bolš efiektyŭna mahli razbudavać svaju strukturu ŭ niešta bolšaje.

— Ja tak razumieju, što połk Kalinoŭskaha stvaraje ciapier palityčnaje kryło?

— Tak, u nas heta jość u płanach, pakul ja nie mahu skazać dakładna, jak heta heta budzie nazyvacca. Ale ŭ płanach heta jość.

— Deputat Alaksiej Hančarenka skazaŭ siońnia nam u intervju, što pryznaje lehitymnymi pradstaŭnikami Biełarusi i połk Kalinoŭskaha, i Śviatłanu Cichanoŭskuju, i Abjadnany pierachodny kabiniet. A čamu Połk Kalinoŭskaha dystancujecca ad Cichanoŭskaj i ad kabinieta?

— My pracujem u inšych płaščyniach. Što datyčyć vajennaha kirunku, jaki nas cikavić u pieršuju čarhu, u pałka niama poŭnaha davieru da tych pradstaŭnikoŭ Kabinieta, jakija adkazvajuć za vajskovy kirunak.

— Heta Valer Sachaščyk.

— U pieršuju čarhu jon.

— Ci sustrakaŭsia połk ź im? Ci jość u vas kantakty?

— Tak, razmaŭlali, sustrakalisia. Apošniaja sustreča była ŭletku.

— A ŭ čym pryčyna niedavieru? Jon stvaraŭ va Ukrainie vajskovuju adzinku biełarusaŭ, jakaja vajuje za Ukrainu. I ciapier uziaŭsia stvarać protaarmiju ci niešta nakštałt hetaha.

— My znachodzimsia tut na miescy i nam lepš bačnyja ŭsie hetyja vajskovyja adzinki. Usio zusim nie tak, jak pra heta raskazvajuć žurnalistam.

— Ci mahčyma vypravić hety niedavier?

— Dla nas niezrazumiełaja pazicyja čałavieka, jaki kaža, što jon pretenduje na rolu hałoŭnakamandujučaha, ale ŭ toj ža čas nie znachodzicca tut z našymi chłopcami. Toje, što jany prapahandavali svajo vajskovaje budaŭnictva, jano faktyčna skončyłasia ničym.

— Jašče da jaho pryznačeńnia adnosiny z asiarodździem Cichanoŭskaj byli ŭ pałku nie vielmi dobryja. Pry tym, što ŭ Kijevie byŭ jaje pradstaŭnik Kavaleŭski, sustrakaŭsia z vami, pieradavaŭ pałku aŭtamabili.

— U nas narmalnaje staŭleńnie da ŭsich, chto dapamahaje pałku i pracuje na vyrašeńnie situacyi pa Biełarusi. Absalutna niama nijakich dyfierencyjanavanych padychodaŭ. Ale kali asoba, jakaja zajaŭlaje, što pretenduje na vajskovaje kiraŭnictva, maje za saboj šlejf… Dy navat śvietapohladna, toje, što my bačyli. Minuły ład žyćcia, tak by mović.

— Vy majecie na ŭvazie staryja vykazvańni Sachaščyka pra rasijskija aficerskija tradycyi i suviazi z Rasijaj?

— Mienavita heta. A taksama realnyja vyniki va Ukrainie, my pra ich viedajem. My absalutna narmalna stavimsia da tych chłopcaŭ, jakija nazyvajuć siabie pałkom «Pahonia». My ličym ich našymi bajavymi pabracimami i pavažajem ich. Ale my pakul nie kamientujem, što heta za połk i ŭ jakim jon stanie. Heta nie zusim naša sprava. Heta pavinny kazać sami tyja chłopcy. Usio nie tak, jak jany zajaŭlajuć u presie.

— A ci bačycie vy mahčymaść supracy z Ofisam Cichanoŭskaj biez Sachaščyka. Abo i ź im? Bo adsutnaść adzinstva zaŭsiody była ŭ minułym prablemaj biełaruskich demakratyčnych siłaŭ.

— Davajcie adkiniem słoŭnaje šałupińnie. Ciapier u rehijonie idzie vajna, my ŭ joj udzielničajem, častkova ŭ jaje ŭžo ŭciahnutaja i Biełaruś. I my ŭsprymajem vielmi kankretna, što tyja ludzi, jakija dapamahajuć nam pieramahčy, Ukrainie, našamu padraździaleńniu, z usimi my hatovyja supracoŭničać. Havorka pra praktyčnuju dapamohu: rečy, amunicyja abo navat palityčna. Tut niama nijakaha supraćdziejańnia ci kankurencyi, tamu što my nakiravanyja na źmienu situacyi ŭ Biełarusi. I kab nam nie zakidali, što my chočam stvaryć niejkuju chuntu paśla skidańnia režymu Łukašenki ŭ Biełarusi, my abvieścim pra praviadzieńnie svabodnych vybaraŭ. Kali asnoŭnym aktaram budzie połk Kalinoŭskaha, to my abvieścim svabodnyja vybary. U ich zmohuć prymać udzieł usie, u tym liku i demakratyčnyja siły. U čym našaja dziejnaść supiarečlivaja i što ŭ vačach niekatorych spadaroŭ my robim nie tak?

— Jak vy staviciesia da tych hałasoŭ, što ŭ vypadku pieramohi Ukrainy połk i inšyja biełaruskija adzinki tam buduć rasfarmavanyja i razzbrojenyja?

— Heta łuchta, jakaja raździmajecca našymi vorahami, heta faktyčna viadziecca infarmacyjnaja vajna. Nijaki połk Kalinoŭskaha nie rasfarmirujuć. Režym Łukašenki padzie da taho času, pakul połk budzie rasfarmiravany. A paśla padzieńnia Łukašenki, mahčyma, jaho rasfarmirujuć.

• 107
• 9
• 12
• 8
• 21