Spyniŭ pracu sajt palityka Alaksandra Kazulina — kozylin.com. Internet-resurs byŭ stvorany napiaredadni prezidenckich vybaraŭ 2006 hoda, u jakich Kazulin udzielničaŭ jak kandydat na pasadu kiraŭnika dziaržavy.
Jak paviedamiŭ BiełaPAN supracoŭnik pres-słužby Kazulina Siarhiej Marcaleŭ, heta adbyłosia z-za pryčyn, što nie zaležać ad kamandy sajta. «U vyniku DDoS-ataki chakiery atrymali dostup da ŭnutranaha źmiestu sajta, — skazaŭ Marcaleŭ. — Byŭ źniščany amal uvieś kantent sajta, u tym liku materyjały knih pa sudovym pracesie Kazulina, materyjały niezaležnych ekśpiertyz hetaha pracesu i inšyja materyjały, jakija adnosiacca da dziejnaści palityka».
Słužbie techničnaj padtrymki sajta ŭdałosia pazbavicca ad pamyłak u prahramnym kodzie, jakija dazvolili chakieram trapić va ŭnutrany źmiest resursu, adnak DDoS-ataki nie spynialisia.
«U vyniku rasijski chostynh-pravajder, parušyŭšy raniej dasiahnutyja damoŭlenaści, vyrašyŭ spynić padtrymku sajta. Vidać, heta było zroblena z metaj zaścierahčy siervier, na jakim raźmiaščaŭsia sajt Kazulina, ad atak», — miarkuje supracoŭnik pres-słužby.
DDoS-ataki (ad anhlijskaha Distributed Denial of Service — raźmierkavanaja admova ŭ absłuhoŭvańni) — vid atak na vyličalnuju sistemu. Ich meta — davieści sistemu da spynieńnia pracy i stvaryć takija ŭmovy, pry jakich karystalniki nie mohuć atrymać dostup da resursaŭ ci hety dostup abciažarany. DDoS-ataka moža być jak samametaj (naprykład zrabić niedastupnym papularny sajt), tak i adnym z krokaŭ da zavałodańnia sistemaj (kali ŭ pazaštatnaj situacyi prahramnaje zabieśpiačeńnie vydaje jakuju-niebudź krytyčnuju infarmacyju: viersiju sajta, častku prahramnaha koda i h.d.). U niekatorych vypadkach da DDoS-ataki pryvodzić lehitymnaje dziejańnie, naprykład pastanoŭka spasyłki na sajt. Vialiki napłyŭ karystalnikaŭ pryvodzić da pieravyšeńnia dapuščalnaj nahruzki na siervier i admovy ŭ absłuhoŭvańni častki ź ich.
