Pravaabaroncy paviedamili, što da liku asob, pryznanych palitviaźniami, dałučajucca jašče 6 čałaviek. Samaja viadomaja ź ich — Darja Łosik, žonka palitviaźnia Ihara Łosika.
Imiony inšych palitźniavolenych — Julija Jurhilevič, Valancin Samasiuk, Jaŭhien Karpaŭ, Maksim Stasiuk, Alaksandr Ajnutdzinaŭ.
Julija Jurhilevič i Darja Łosik uziatyja pad vartu pavodle abvinavačvańnia ŭ sadziejničańni ekstremisckaj dziejnaści (pa art. 361-4 KK);
Valancin Samasiuk asudžany da pazbaŭleńnia voli ŭ papraŭčaj kałonii za adpraŭku ŭ Telegram-čat, pryznany ekstremisckim farmiravańniem, niekalkich fatahrafij čyhunačnaj techniki (pa art. 361-4 KK);
Jaŭhien Karpaŭ asudžany za zamach na ŭdzieł u vajennych dziejańniach na terytoryi zamiežnaj dziaržavy — ažyćciaŭleńnie namieru dałučycca da abaroncaŭ suvierennaj Ukrainy (pavodle č. 1 art. 14 i č. 1 art. 361-3 KK da dvuch hadoŭ i šaści miesiacaŭ pazbaŭleńnia voli ŭ papraŭčaj kałonii);
Maksim Stasiuk uziaty pad vartu pavodle abvinavačvańnia va ŭdziele ŭ hrupavych dziejańniach, jakija hruba parušajuć hramadski paradak, i zamachu na ŭdzieł u vajennych dziejańniach na terytoryi zamiežnaj dziaržavy — ažyćciaŭleńnie namieru dałučycca da abaroncaŭ Ukrainy (pavodle č. 1 art. 342 i č. 1 art. 361-3 KK);
Alaksandr Ajnutdzinaŭ uziaty pad vartu pavodle abvinavačvańnia ŭ nieadnarazovym kiravańni transpartnym srodkam biez adpaviednaha prava (złačynstva, jakoje nie ŭjaŭlaje vialikaj hramadskaj niebiaśpieki) i zamachu na ŭdzieł u vajennych dziejańniach na terytoryi zamiežnaj dziaržavy — ažyćciaŭleńnie namieru dałučycca da abaroncaŭ Ukrainy (pa č. 1 art. 317-2 i č. 1 art. 361-3 KK).
Ahulnaja kolkaść palitviaźniaŭ na siońniašni dzień — 1357 čałaviek.
Praŭda, varta ŭličvać, što ŭ hetuju statystyku ŭvachodziać daloka nie ŭsie, chto znachodzicca ŭ źniavoleńni pa palityčnych pryčynach, realnaja kolkaść biełaruskich palitviaźniaŭ našmat bolšaja.
Ciapier čytajuć
U budynku HUBAZiKa ŭ centry Minska adkryjuć małuju scenu teatra Janki Kupały10
Kamientary