U Rasii raspracavali mietadyčki, jak prapahandystam apraŭdvać adstupleńnie z Chiersona
Jak śćviardžajuć blizkija da Kramla krynicy «Mieduzy», Administracyja Prezidenta Rasii padrychtavała niekalki novych mietadyčak dla rasijskich prapahandystaŭ. U ich raśpisana, jak treba raskazvać pra situacyju ŭ Chiersonie, kab padrychtavać «hramadskuju dumku» ŭ Rasii da taho, što horad moža być pakinuty. Dźvie ź ich apynulisia ŭ rasparadžeńni «Mieduzy».
U adnym z dakumientaŭ adznačajecca, što chiersonski kirunak — «samaje składanaje dla ruskaj armii na biahučym etapie śpiecapieracyi». Takuju situacyju prapahandystam prapanujuć tłumačyć tym, što Ukrainie «žyćciova nieabchodna prademanstravać bajazdolnaść svaich terarystyčnych farmiravańniaŭ, kab prasić novuju dapamohu ŭ Zachadu». Kijeŭ, maŭlaŭ, nie budzie ličycca z ułasnymi stratami — jon hatovy zahubić dziasiatki tysiač svaich i čužych dziela novych tranšaŭ i pastavak zbroi. U toj ža čas rasijskija vojski nibyta imknucca zachavać žyćci mirnych žycharoŭ i asabovaha składu.
Mienavita niebiaśpiekaj naniasieńnia masiravanaha ŭdaru pa horadzie vielizarnaj hrupoŭkaj «nacyjanalistaŭ» pradyktavanaja, maŭlaŭ, evakuacyja mirnych žycharoŭ horada na levy bierah Dniapra. Prarasijskija ŭłady pačali vyvozić ludziej z pravabiarežža Dniapra ŭ anieksavanaj Chiersonskaj vobłaści jašče ŭ siaredzinie kastryčnika. U pačatku listapada Uładzimir Pucin zajaviŭ, što «cyvilnaje nasielnictva» Chiersona treba «prybrać» z zony bajavych dziejańniaŭ, i akupacyjnyja ŭłady abviaścili «prymusovuju evakuacyju». 7 listapada było abvieščana ab zakančeńni hetaj «evakuacyi» — pry hetym, jak pisała «Mieduza», niekatoryja žychary zastajucca ŭ horadzie i čakajuć prychodu ŭkrainskaj armii.
U jakaści jašče adnoj pryčyny dla mahčymaha adstupleńnia z Chiersona ŭ mietadyčcy adznačajecca, što Ukraina i krainy NATA «kinuli ŭsie siły» mienavita na hety kirunak frontu — i heta pahražaje «vielizarnym krovapralićciem»: Zialenski choča arhanizavać krovapralitnaje šou na ŭvieś śviet, pradstavić USU pakutnikami, zapatrabavać novych hrošaj. Praciŭnik choča, kab Chierson staŭ pastkaj dla Rasii, polem bitvy ź dziasiatkami tysiač achviaraŭ. USU płanujuć zładzić terakt, razburyŭšy Kachoŭskuju HES. Padryŭ HES moža stać «pastkaj» dla rasijskich bajcoŭ. U hetym vypadku buduć zatoplenyja nasielenyja punkty ź mirnymi žycharami, rasijskija vajskoŭcy apynucca ŭ katle i navat nie zmohuć pryniać boj — ich prosta zmyje.
Akramia taho, prapahandystam rekamiendavana padkreślić, što viadzieńnie haradskich bajoŭ u Chiersonie «niemetazhodna», tamu što «jany zaŭsiody samyja ciažkija i razburalnyja», a USU «mohuć prosta zraŭniać Chierson ź ziamloj».
U druhoj mietadyčcy, padrychtavanaj u Kramli, asobna prapisana, što dziaržprapahandzie treba «źviarnuć uvahu» na vystupleńnie dypłamata, historyka i palitołaha, člena navukovaha savieta pry Radzie Biaśpieki RF Anatola Tarkunova. Na sustrečy Pucina z historykami Tarkunoŭ uspomniŭ pra Pałtaŭskuju bitvu i zajaviŭ, što da pieramohi ŭ joj Piotr I «adychodziŭ da Pałtavy», i mienavita adstupleńnie ŭ rešcie rešt pryviało da «pierałomu ŭ vajnie».
Dźvie krynicy «Mieduzy», blizkija da Kramla, adznačajuć, što ciapier rasijskija ŭłady ličać zdaču Chiersona «niepažadanym», ale «vierahodnym» varyjantam raźvićcia padziej na froncie. Choć raniej rasijskija čynoŭniki (u tym liku samyja vysokapastaŭlenyja) nie adnojčy kazali, što «Rasieja nazaŭždy» na terytoryjach rehijona, zachoplenych u samym pačatku vajny.
Sa słoŭ surazmoŭcaŭ «Mieduzy», kančatkovaje rašeńnie ab adychodzie z Chiersona pavinien budzie pryniać asabista Pucin pry ŭdziele ludziej sa svajho «blizkaha koła» (paśla pačatku vajny jon u asnoŭnym składajecca z vysokapastaŭlenych siłavikoŭ).
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary