Prajektam biudžetu Rasijskaj Fiederacyi na 2010—2012 hady praduhledžana finansavańnie budaŭnictva biełaruskaj atamnaj elektrastancyi.
Pra heta paviedamiŭ žurnalistam 9 kastryčnika ŭ Astraŭcy (Hrodzienskaja vobłaść) Alaksandr Hłuchaŭ, pieršy vice‑prezident ZAT «Atamstrojekspart» (Rasija), jakoje płanuje budavać AES u Biełarusi.
Pavodle jaho słoŭ, heta trochhadovaje finansavańnie, i jaho abjomy zapłanavany zychodziačy z ahulnaha abjomu finansavańnia budaŭnictva AES.
Hłuchaŭ padkreśliŭ, što prajekt biudžetu jašče nie zaćvierdžany. Razam z tym, skazaŭ jon, praduhledžanych srodkaŭ budzie całkam dastatkova dla finansavańnia budaŭnictva AES u Biełarusi. Košt atamnaj stancyi budzie vyznačany pahadnieńniem. Dakumient užo rychtujecca dla praviadzieńnia paŭnavartasnych pieramoŭ ab finansavańni.
Jak paviedamlałasia raniej, na budaŭnictva ŭ Biełarusi AES i infrastruktury stancyi, pavodle raźlikaŭ śpiecyjalistaŭ, nieabchodna 9 młrd. dalaraŭ ZŠA.
Hłuchaŭ padkreśliŭ, što ŭ prajekt budaŭnictva AES budzie ŭklučany kompleks pa pierapracoŭcy vadkich i ćviordych jadziernych adchodaŭ, a taksama schovišča dla ich. Praduhledžvajecca ekspłuatacyja hetaha schovišča na praciahu pieršych 20 hadoŭ pracy AES. U dalejšym, pry pavieličeńni terminaŭ ekspłuatacyi AES da 50 hadoŭ, miarkujecca budaŭnictva dadatkovych schoviščaŭ.
Jak paviedamiŭ žurnalistam namieśnik ministra enierhietyki Biełarusi Michaił Michadziuk, praduhledžvajecca, što buduć pabudavany try enierhabłoki. Dva pieršyja buduć dziaržaŭnyja, budaŭnictva treciaha, mahčyma, budzie ažyćcioŭlena z udziełam źniešnich inviestaraŭ, paviedamiŭ jon. Taksama, pavodle słoŭ namieśnika ministra enierhietyki, ciapier rychtujecca mižuradavaje pahadnieńnie ab budaŭnictvie stancyi, jakoje praduhledžvaje zakupku jadziernaha paliva ŭ tym liku ŭ Rasii. Jon padkreśliŭ, što heta nie pavysić enierhazaležnaść Biełarusi ad Rasii.
9 kastryčnika ŭ Astraŭcy prachodziać hramadskija słuchańni, pryśviečanyja papiaredniaj spravazdačy ab acency ŭździejańnia na navakolnaje asiarodździe biełaruskaj AES.
