Druhoje pryšeście Kanaplova: Łukašenka viarnuŭ u favor byłoha najlepšaha siabra, jaki jaho ledź nie skinuŭ
Jak raskazali «Našaj Nivie» dźvie nie źviazanyja miž saboj krynicy, pry dvary Łukašenki znoŭ źjaviłasia demaničnaja fihura Uładzimira Kanaplova — škłoŭskaha ŭčastkovaha, siabra maładości Łukašenki, jaki ŭ adzin momant uźniośsia nastolki, što zadumaŭ skinuć svajho patrona, za što i papłaciŭsia. Na fonie novaha ŭzvyšeńnia Kanaplovu pačało zdavacca, što jamu mnohija pavinny za staryja spravy.
Jak stała viadoma «Našaj Nivie», były «najlepšy siabar Alaksandra Łukašenki», były staršynia Pałaty pradstaŭnikoŭ i były ŭčastkovy sa Škłova Uładzimir Kanaploŭ niečakana vyjšaŭ ź niabytu paśla šmathadovaj apały i znoŭ staŭ nabližanym da Łukašenki.
Viadoma minimum pra adnu «aficyjnuju» sustreču Kanaplova z Łukašenkam asabista, pra jakuju ŭ dziaržaŭnych ŚMI paviedamleńniaŭ nie było.
Ale znajomyja ź situacyjaj u «pałacy» tłumačać, što Kanaploŭ, choć jašče i nie źjaŭlajecca na TB, užo staŭ častym hościem na mierapryjemstvach u vuzkim kole.
«Ciapier jamu šukajuć miesca ŭ sistemie, chočuć niejak jaho ŭbudavać», — dadajuć abaznanyja.
Pryčyny palityčnaj reinkarnacyi staršyni fiederacyi handboła, pra «słaŭnyja časy» jakoha ciapier niama nivodnaj zhadki ŭ BiełTA, dakładna nieviadomyja.
Naziralniki źviazvajuć heta sa svojeasablivym maralna-psichałahičnym stanam Łukašenki, jaki žyvie ŭ atmaśfiery viečnaha niedavieru, u jakoj niama adkul uziacca novym siabram — prychodzicca ŭspaminać pra starych.
«Tym bolš, što z časoŭ svajoj zdrady i adstaŭki pry kancy 2007-ha jon užo ni słovam ni paŭsłovam nie pasiahaŭ na łukašenkava, pramaŭčaŭ u 2020-m, nie pieramiatnuŭsia, zastaŭsia ŭžo ź viernaściu pabitaha sabaki. 15 hadoŭ siadzieŭ cicha i maŭčaŭ. Dumaju, heta zaŭvažana i aceniena», — dadaje inšy surazmoŭca.
Da «Našaj Nivy» dachodziać sihnały, što Uładzimir Kanaploŭ pačaŭ adnaŭlać staryja «patron-klijenckija suviazi» ŭ biełaruskim biznesie — u jakaści patrona.
Uładzimir Kanaploŭ byŭ vielmi blizki da Alaksandra Łukašenki padčas apieracyi pa fizičnaj likvidacyi palityčnych apanientaŭ Łukašenki ŭ 1999—2000 hadach.
Mała ad kaho možna pačuć pazityŭnuju charaktarystyku hetaha 68-hadovaha mužčyny ź ciažkim pozirkam, ale heta simptamatyčnaja fihura ŭ historyi biełaruskaj dyktatury.
Hety ŭčastkovy inśpiektar pa spravach niepaŭnaletnich u Škłovie siabravaŭ sa svaim adnahodkam, dyrektaram saŭhasa Alaksandram Łukašenkam. Kali toj prabiŭsia ŭ deputaty ŭ 1990 hodzie, Kanaploŭ staŭ pamočnikam.
U 1994 hodzie mienavita Kanaploŭ staŭ matoram inicyjatyŭnaj hrupy pa zbory podpisaŭ za kandydata ŭ prezidenty Alaksandra Łukašenku. Kali Łukašenka staŭ prezidentam, były ŭčastkovy staŭ, faktyčna, druhim čałaviekam u krainie. Ën byŭ niepataplalnym rašałam, jaki moh adnym zvankom zakryć luboje pytańnie ŭ krainie: vydaču ziamli, spynieńnie pravierki, pryznačeńnie kadra ci zvalnieńnie.
Usio heta jon rabiŭ «imiem prezidenta». Nichto nie viedaŭ, što ŭ realnaści jamu skazaŭ Łukašenka, ale ŭsie viedali, što Kanaploŭ z Łukašenkam havoryć na «ty».
«Kanaploŭ byŭ vyšejšy za hienprakurora i premjera, jany byli tak — pryznačency, a Kanaploŭ — darahim sercu Łukašenki», — kažuć tyja, chto sutykaŭsia z upłyvam hetaha čałavieka.
Blizkaść da sonca zakruciła hałavu ŭčastkovamu.
«U Mahiloŭskaj vobłaści Kanaplovu ŭsie kłanialisia, luby čynoŭnik. Jon tam byŭ boham tady. Suviazi pa krainie byli vializnyja, hrošy da jaho ciakli.
U niejki momant Kanaplovu padałosia, što jon užo nastolki mocny, što moža Łukašenku zamiaścić i kiravać lepš. Ën staŭ jeździć pa krainie i farmiravać svaju hrupoŭku. I tady ŭ mahiloŭskich łaźniach pačali padymać tosty «za novaha prezidenta». A sam Kanaploŭ pajechaŭ na «ahledziny» ŭ Maskvu.
Kali pra heta dakłali Łukašenku, toj byŭ u šalenstvie. Ale čapać Kanaplova było nielha, bo jon «byŭ u Maskvie». Tamu pačali vyrazać usio, što było navokał.
Usich, chto jamu prysiahnuŭ, pierasadžali. Faktyčna, u hety momant pierastaŭ isnavać «mahiloŭski kłan» jak kuźnia kadraŭ dla łukašenkaŭskaj ułady — Łukašenka namahańniami Kanaplova pierastaŭ daviarać svaim ziemlakam. Mahiloŭskija potym nie ŭźlatali nikoli.
Pa infarmacyi «Našaj Nivy», mienavita z toj historyjaj byŭ źviazany adjezd ź Biełarusi zasnavalnikaŭ «Jeŭraopta» Uładzimira Vasilko i Siarhieja Litvina, bo jany padtrymlivali blizkija adnosiny z Kanaplovym.
«Niekatoryja navat mierkavali, što jany zic-staršyni funty, a biznes stvorany Kanaplovym. Ale jon jak biznesmien słaby, u jaho b ničoha nie atrymałasia, tamu ja ŭ takuju teoryju nie vieru. Litvina i Vasilko niejak zapisali ŭ blizkija kantakty Kanaplova, ale ich papiaredzili i jany źjechali — voś i ŭsio», — tłumačyć «Našaj Nivie» vieteran siłavych struktur, jaki naziraŭ padziei na ŭłasnyja vočy.
U 2007-m Uładzimir Kanaploŭ syšoŭ u adstaŭku «pa stanie zdaroŭja» z pasady kiraŭnika Pałaty pradstaŭnikoŭ.
Straciŭšy i aficyjnyja, i nieaficyjnyja ryčahi ŭłady, Kanaploŭ zastaŭsia, adnak, staršynioj fiederacyi handboła.
A ŭ 2013-m Kanaploŭ navat trapiŭ u SIZA pa spravie namieśnika hienprakurora Alaksandra Archipava. Na sudzie jon abyšoŭsia štrafam, ale atrymaŭ taŭro sudzimaha.
Kali vy viedajecie bolš na hetuju ci inšyja temy, źviažyciesia z aŭtaram praz telehram @artsiom_harbatsevich ci mejł [email protected]
-
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni
-
Chalezin: Samyja vialikija hanieńni na Svabodny teatr byli pry Łatušku. Ale jamu nie treba kajacca pierada mnoju
-
Ci mohuć nie puścić u kramu za 5 chvilin da zakryćcia i da jakoha času pavinny pracavać kasirki
Usio zdaryłasia na Novy hod. Śmierć samaj publičnaj supracoŭnicy minskaha AMAPa dahetul pakidaje pytańni14
Kamientary