Pasyłki z bombami atrymali ispanski premjer, Minabarony krainy i pastaŭščyk zbroi dla Ukrainy
Pasyłki z bombami za apošni čas byli nakiravanyja ispanskamu premjeru Pedra Sančesu, u Minabarony krainy, u spadarožnikavy centr avijabazy Tarechon-de-Ardas, jaki pieradaje infarmacyju Ukrainie, a taksama ŭ kampaniju Instalaza, jakaja ŭ tym liku pastaŭlaje zbroju Kijevu. Pra heta palicyja paviedamiła Nacyjanalnamu sudu Respubliki, piša hazieta El Mundo.
Kanviert dla kiraŭnika ŭrada pierachapili tydzień tamu, 24 listapada, padčas nadhladu karespandencyi supracoŭnikami słužby biaśpieki. Jaho adpravili zvyčajnaj poštaj, udakładniaje vydańnie.
Ranicaj 1 śniežnia padobny kanviert z vybuchoŭkaj pryjšoŭ na avijabazu ŭ horadzie Tarechon-de-Ardas u pravincyi Madryd. U toj ža dzień Ministerstva abarony krainy atrymała jašče adzin list z vybuchovym rečyvam — jaho dasłali pa pošcie ź ispanskaha adrasa.
30 listapada ŭ Ispanii vyjavili jašče adzin pakiet — jaho dasłali pa adrasie kampanii Instalaza ŭ Sarahosie, jakaja vyrablaje vajennuju techniku. RPH vytvorčaści Instalaza vykarystoŭvaje ŭ tym liku Ukraina ŭ vajnie z Rasijaj, adznačaje El Periodico. Pradstaŭnik urada ŭ Sarahosie Roza Sierana zajaviła, što pakiet u adras kampanii pryjšoŭ z Ukrainy.
Pa danych El Mundo, bomby byli «zapalnaha, a nie vybuchovaha» dziejańnia. Pryłada spracoŭvała, kali paciahnuć za losku.
Raniej 30 listapada ŚMI paviedamili ab vybuchu ŭ pasolstvie Ukrainy ŭ Madrydzie. Jak paźniej zajaviŭ kiraŭnik dypmisii Ukrainy Siarhiej Paharelcaŭ, vybuchovaje prystasavańnie było ŭ adnoj z pasyłak, jakaja, ź jahonych słoŭ, pryznačałasia dla ŭkrainskaha ambasadara. U vyniku vybuchu byŭ paranieny kamiendant pasolstva, jakomu sakratar dypłamata pieradaŭ skrynku.
Kamientary