Adzin ź vieteranaŭ «Doždia» Uładzimir Ramienski i dziełavaja žurnalistka Marharyta Lutava, jakaja viała svaju prahramu, abviaścili pra sychod z telekanała paśla taho, jak adtul byŭ zvolnieny viadučy Alaksiej Karaścialoŭ, jaki skazaŭ u efiry słovy, jakija mahli być uspryniatyja jak kłopat pra rasijskich mabilizavanych na ŭkrainskim froncie. Pra heta Ramienski i Lutava paviedamili ŭ sacsietkach, paviedamlaje zona.media.
Ramienski rastłumačyŭ, što padčas viačerniaj infarmacyjnaj prahramy ŭ čaćvier jon byŭ jaje šef-pradziusaram, jaki siarod inšaha praz słuchaŭki moža rabić padkazki viadučamu.
«Sam u poŭnaj miery niasu adkaznaść za toj vypusk. «Siadzieŭ na vuchu» šef-redaktaram. Doŭh zahadvaje pakłaści značok i revalvier na stoł. Što i rablu. «Dožd́», karaleva-maci, ale vy dapuścili žachlivuju pamyłku», — nie pahadziŭsia z rašeńniem kiraŭnictva telekanała Ramienski. Na jaho dumku, «Dožd́» «prynios u achviaru» svajho čałavieka.
Lutava taksama ličyć, što ludzi majuć «prava na pamyłku i prava publična parazumiecca da publičnaha zvalnieńnia». Na jaje dumku, reakcyja kanała na skandał supiarečyć dekłaravanym im pryncypam humanizmu, adkrytaści i sumlennaści.
Karaścialoŭ, začytvajučy ŭ efiry prośbu redakcyi adpraŭlać paviedamleńni na poštu telekanała ab parušeńniach pry mabilizacyi, dadaŭ (vidać, ad siabie): «my spadziajomsia, što mnohim vajskoŭcam u tym liku my zmahli dapamahčy, naprykład, z ryštunkam i prosta z elemientarnymi vyhodami na froncie».
Hetyja słovy vyklikali burnuju reakcyju z boku sacsietak i ŭładaŭ Łatvii, i jašče ŭ noč na piatnicu hałoŭny redaktar «Doždia» Cichan Dziadko paprasiŭ prabačeńnia za ich, a dniom načalnica słužby navin Kaciaryna Katrykadze abviaściła ab spynieńni supracoŭnictva z Karaścialovym. «Kiraŭnictva «Doždia» ličyć jaho adzina pravilnym i mahčymym», — skazała jana ŭ pramym efiry.
Tym nie mienš Słužba dziaržbiaśpieki Łatvii pačała pravierku z-za skazanych Karaścialovym słoŭ. U piatnicu taksama stała viadoma ab druhim parušeńni, vyjaŭlenym za apošnija miesiacy ŭ efiry «Doždia» łatvijskim rehulataram — treciaje papiaredžańnie pryviadzie da adklikańnia licenzii. «Zvalnieńniu, kali jano vyratuje telekanał i dazvolić maim kaleham i dalej pracavać, ja nie piareču», — zapeŭnivaje Karaścialoŭ, majučy na ŭvazie pracu telekanała ŭ Ryzie.
Ciapier čytajuć
Biełaruska kliča na viasielle zorku «Univiera», jaki za vajnu. Uprehsia ŭvieś Threads13
Kamientary