Kamu pasłuhuje atamny džyn

Budaŭnictva AES moža pierakinuć mastok miž Biełaruśsiu i Zachadam. Piša Alaksandar Kłaskoŭski.

Vystupajučy ŭ aŭtorak pierad ajčynnymi dyplamatami, aficyjny lider daŭ zrazumieć, što budaŭnictva atamnaj stancyi – pytańnie vyrašanaje. Havorka idzie, maŭlaŭ, pra enerhietyčnuju biaśpieku i nia tolki.

Uvohule ž, zaŭvažcie, nia pieršy miesiac rychtujecca psychalahičnaja hleba pad zapusk prajektu, vyklučna adčuvalnaha dla postčarnobylskaj krainy. Bolš taho, u vačoch Zachadu hetaja kraina – pieradusim «apošniaja dyktatura Eŭropy».

Tut možna zhadać, što raniej biełaruski kiraŭnik nie adnojčy škadavaŭ ab stracie savieckich jadziernych rakietaŭ. A ŭ krasaviku ŭ Brahinie šmatznačna skazaŭ, što kab my mieli AES, to ŭ śviecie da nas stavilisia b inačaj.

Jak tolki papaŭźli čutki pra plany zbudavać stancyju, były deputat Uładzimier Parfianovič pačaŭ bić u zvany, papiaredžvajučy pra niebiaśpieku «Paŭnočnaje Karei ŭ Eŭropie», «šantažu susiedziaŭ i ŭsiaho śvietu pavodle prykładu Pchieńjanu», «pieratvareńnia biełarusaŭ ŭ jadziernych zakładnikaŭ».

Zachad pakul što naziraje za siužetam zbolšaha moŭčki. Čamu? Vajskovy ekspert Alaksandar Alesin miarkuje, što, jak ni paradaksalna, Miensk i Zachad akurat tut mohuć i parazumiecca. Bo i Łukašenka, i Eŭropa zakłapočanyja rasiejskim enerhietyčnym dyktatam. Budaŭnictva AES mahło b stać vyhadnaj zamovaj, naprykład, dla francuzaŭ. Maskva prapanoŭvaje tańniejšy prajekt, ale ž paśla taho, jak rasiejskaja rakieta sapsavała naša tryjumfalnaje ŭstupleńnie ŭ klub kaśmičnych dziaržaŭ, sto razoŭ padumaješ, ci patrebna nam ichniaje firmovaje «diešievo i sierdito».

Naturalna, supracoŭnictva z Zachadam mahčymaje pry pilnym kantroli nad biełaruskaj atamnaj prahramaj z boku mižnarodnych instytucyjaŭ. Darečy, MAHATE, maračy pra ŭzmacnieńnie svaich pazycyjaŭ, całkam moža prajavić tut zyčlivaść, kaža Alesin.

Takim čynam, na atamnaha džyna možna hladzieć pa-roznamu – i jak na strašnuju pahrozu, i jak na dobraha słužku.

Pierad apazycyjaj, jak padajecca, uźnikaje dylema. Z adnaho boku, uzmacnieńnie enerhietyčnaj niezaležnaści – heta biassprečny plus. Razam z tym, zmaharam suprać režymu niejak nielahična ihnaravać Parfianovičavy arhumenty...

Aproč taho, jość i sumnievy čysta ekanamičnaha kštałtu, dadaje analityk Valer Karbalevič. Dyj sacyjalohija śviedčyć, što balšynia biełarusaŭ nie padtrymlivajuć idei svajho «mirnaha atamu». Pryčym cikava, što siarod Łukašenkavych prychilnikaŭ dola praciŭnikaŭ AES navat bolšaja. Chiba nie spakuśliva zhulać na elektaralnym poli dziejnaha kiraŭnika?

Abjadnanyja demakraty pakul što nie vypracoŭvali pazycyi adnosna AES, paviedamiŭ mnie Vincuk Viačorka. Sam ža jon ličyć, što takoje surjoznaje pytańnie musić vyrašacca hałosna demakratyčnym uradam.

Słušna, ale ž my žyviom u inšaj Biełarusi, i pytańnie pra mirny atam staić rubam mienavita ciapier. Ułada zhieneravała svoj plan, dobry ci kiepski. A jaje palityčnyja apanenty znoŭ zapaźniajucca z reakcyjaj, nie havoračy ŭžo pra hulniu na apiaredžańnie. Tak voś i žyviom.

• 0
• 0
• 0
• 0
• 0
• 0
• 0
• 0