Biełaruskija noŭtbuki źnikli z prodažu praz try dni paśla pačatku. I heta nie vyhladaje, jak ažyjataž
U handlova-zabaŭlalnym centry Galeria Minsk źnik punkt prodažu noŭtbukaŭ H-book MAK4.
Prodaž noŭtbukaŭ ajčynnaj vytvorčaści ŭ centry biełaruskaj stalicy doŭžyŭsia ŭsiaho niekalki dzion, paviedamlaje Sputnik.
«Punkt prodažu źjechaŭ. U nas ich dakładna ŭžo nie budzie. Astatniaje nie viedajem», — patłumačyli ŭ infacentry HC Galleria Minsk.
U kramach elektratechniki noŭtbuk tak i nie źjaviŭsia. Niama navinki ni na sajcie «Haryzonta», ni ŭ internet-kramach.
«Pieršy biełaruski noŭtbuk vychodzić na rynak u madeli H-book MAK4. Heta ajčynnaja raspracoŭka, stvoranaja na asnovie pieradavoha dośviedu i technałohij. Heta sučasny kampjutar, jaki pa svajoj jakaści i pradukcyjnaści paraŭnalny sa znakamitymi brendami. Aparatnaja asnova H-book MAK4 raspracavana na pracesarach Intel Core 11 pakaleńnia, jakija zabiaśpiečvajuć pakazčyki bieśpierabojnaj pracy i vysokaj pradukcyjnaści jak va ŭmovach ofisnaj i chatniaj pracy, tak i pry vykanańni zadač vysokaj sistemnaj nahruzki, zachoŭvajučy pry hetym vyklučnuju aŭtanomnaść», — raskazvaŭ BiełTA hienieralny dyrektar «Haryzonta» Juryj Pradko.
Madel na i-3 pracesary pradavałasia ŭ hetym punkcie za 1599 rubloŭ, pisała Tochka.by. Raniej paviedamlałasia, što biełaruski noŭtbuk u bazavaj kamplektacyi z dyjahanallu 15,6 calaŭ abydziecca ŭ sumu ad 1300 rubloŭ, ale, jak patłumačyŭ kansultant, vyjšła krychu daražej z-za łahistyki.
Cikava, što ŭ adździele prodažu pradpryjemstva «Haryzont», kudy telefanavała «Naša Niva», nie stali nazyvać canu.
«Cen u mianie niama. Prychodźcie na vystavu ŭ Galleria Minsk, tam možna pahladzieć noŭtbuki i ceny», — adkazali ŭ adździele.
Vyhladaje, što ciapier i hetaj mahčymaści niama.
Sieryjnaja vytvorčaść noŭtbukaŭ musiła startavać u listapadzie, ale zatym jaje pieranieśli na śniežań. U 2023 hodzie płanujuć vypuścić ci to 80 madelaŭ, ci to 80 štuk.
Ciapier čytajuć
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1414
Kamientary