Situacyja z demakratyjaj u śviecie krychu palepšyłasia ŭ 2022 hodzie paśla źniaćcia kavidnych abmiežavańniaŭ, ale značna pahoršyłasia ŭ Rasii paśla jaje ŭvarvańnia va Ukrainu, paviedamiła BBC sa spasyłkaj na hrupu daśledčykaŭ Economist Intelligence Unit (EIU) u štohadovym daśledavańni «Indeks demakratyi».
Pa danych EIU, mienš za pałovu nasielnictva płaniety (45,3%) žyvie va ŭmovach demakratyi, bolš za treć — 36,9% — va ŭmovach aŭtarytarnaha praŭleńnia, hałoŭnym čynam — u Rasii i Kitai.
Krychu mienš za 8% nasielnictva žyvie va ŭmovach «poŭnaj demakratyi» — u hetaj hrupie bolš za 20 krain, u tym liku Kanada, Šviecyja i Uruhvaj.
«Paśla ŭvarvańnia va Ukrainu [demakratyčnyja] pakazčyki Rasii pakazali samaje rezkaje padzieńnie siarod usich krain śvietu, — zajaviła analityčnaja hrupa. — Rasija ŭžo doŭhi čas znachodzicca na trajektoryi adychodu ad demakratyi i ciapier nabyvaje mnohija charakternyja rysy dyktatury».
U EIU adznačajuć, što rasijskija ŭłady ažyćciaŭlajuć biesprecedentnyja represii suprać ŚMI i apazicyi z tych časoŭ, jak prezident Rasii Uładzimir Pucin uvioŭ vojski va Ukrainu hod tamu.
Siarod stanoŭčych tendencyj, jakija adznačajuć analityki, — pierachod Čyli, Francyi i Ispanii z katehoryi «niedaskanałaja demakratyja» ŭ katehoryju «poŭnaja demakratyja» — u asnoŭnym heta adbyłosia praz skasavańnie žorstkich karanavirusnych zachadaŭ, jakija abmiažoŭvali svabodu hramadzian.
«Ale z hłabalnaha punktu hledžańnia 2022 hod byŭ rasčaravalnym dla demakratyi», — havorycca ŭ daśledavańni.
Kamientary