U papularnym amierykanskim sieryjale i novym «Avatary» syhrała dačka biełaruskaj tenisistki
Vosieńniu 2022 hoda amierykanski kanał AMS pradstaviŭ sieryjalnuju viersiju «Intervju z vampiram» — znakamitaj karciny 1994 hoda z Tomam Kruzam i Bredam Pitam. Akazałasia, što adna z zorak novaha šou maje ciesnuju suviaź ź Biełaruśsiu.
«Intervju z vampiram» źniali pa adnajmiennym biestsielery 1976 hoda piśmieńnicy En Rajs. U centry knihi i jaje ekranizacyj lažyć historyja vampira Łui, jakomu bolš čym 200 hadoŭ. Niekali jon byŭ maładym płantataram, ale straciŭ žonku i dzicia, a potym i zhubiŭ sens žyćcia. Jon šukaje śmierci, ale znachodzić sapraŭdnaha vampira, jaki pieratvaraje Łui ŭ takuju ž istotu. Praz stahodździ Łui raskazvaje pra svajo žyćcio reparcioru.
Padčas svajho vampirskaha žyćcia Łui sustrakaje maleńkuju dziaŭčynku Kłodziju, jakaja taksama pieratvarajecca ŭ vampira i niejki čas supravadžaje Łui. Jana robicca takoj istotaj, jašče kali była dziciom, tamu bijałahična zastajecca dziciom zaŭsiody, chacia jaje rozum i staleje, i da achviar svaich Kłodzija stavicca nie pa-dziciačamu žorstka.
Dziaŭčynu-vampira hraje 19-hadovaja aktrysa Bejli Bas rodam z Łos-Andželesa.
Jaje baćka, chutčej za ŭsio, afraamierykaniec, a voś maci — biełaruska Alesia Ihnaćjeva. Jak raskazvała sama Bejli, jaje maci ŭ svoj čas dobra hulała ŭ tenis i, dziakujučy hetamu, atrymała stypiendyju. Na tenisnych resursach sapraŭdy možna znajści ŭryŭkavyja źviestki pra takuju tenisistku, jakaja ŭ kancy 90-ch hadoŭ prymała ŭdzieł u niekalkich turnirach, zbolšaha junijorskich.
Ale vialikich pośpiechaŭ u tenisie biełaruska nie dasiahnuła i praktyčna z usich turniraŭ, pra jakija zachavalisia aficyjnyja źviestki, jana adrazu vylatała. Miarkujučy pa jaje instahramie, ciapier Alesia zarablaje na žyćcio dermatałohijaj abo niečym źviazanym z prodažam tavaraŭ dla skury.
U Bejli jość brat Ełajdža i zvodny brat Majki, a taksama pryjomny baćka Dejv Markien. Alesia addała dvuch starejšych dziaciej u madelny biznes, jašče kali jany byli maleńkimi. Bejli źniałasia ŭ svajoj pieršaj rekłamie ŭ 2008 hodzie, a potym zacikaviłasia akciorskaj pracaj.
Ciapier u bahažy dziaŭčyny, akramia roli ŭ «Intervju z vampiram», jašče i rola Cirei — maładoj nyrački z płaniety Pandora, jakaja źjaviłasia ŭ niadaŭnim supierkasavym sikvele «Avatara» — «Avatar: Šlach vady».
Kali kazać pra 2022 hod, jana syhrała hałoŭnuju rolu ŭ telefilmie «Dar zabojstva» pra dziaŭčynu-padletka, jakaja pieravodzicca ŭ inšuju škołu i kanfliktuje ź miascovaj pryhažuniaj. Taksama Bas źjaviłasia ŭ asnoŭnym składzie sieryjała «U takim uzroście» pra siamiejstva Kupier, čyj śviet napoŭnieny ciomnymi tajnami.
Jak by daloka ni była Bejli ad Biełarusi, jana pamiataje pra toje, dzie naradziłasia jaje maci. U intervju dziaŭčyna kazała: «Ja vyrasła ŭ pieravažna ruskim rajonie, tak što ja była pahružanaja ŭ biełaruskuju kulturu, a taksama ŭ ruskuju i kazachskuju. Pakul ja rasła, ja razmaŭlała pa-rusku, i mnie heta padabajecca. Mnie padabajecca tak pahružacca ŭ svaju kulturu, bo navat chacia ja i nikoli nie była ŭ Biełarusi, ja adčuvaju, što viedaju pra jaje tak šmat».
«Naša Niva» — bastyjon biełaruščyny
PADTRYMAĆ«Avatar 2: šlach vady», albo Druhoje pahružeńnie ŭ Pandoru
Jak 21-hadovaja polka z maleńkaha haradka ŭźlacieła na viaršyniu suśvietnaha tenisa — historyja novaj pieršaj rakietki
«Avatar»-2 zarabiŭ zvyš dvuch miljardaŭ dalaraŭ u suśvietnym prakacie
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ8
Kamientary